Къаьстта терко тӀаяхийтар 63 шу даьннача ГӏалгӀайчен механизатора Къоастой Султангирена, юртбоахама даькъ тӀа цун карагӀдаьнначун лакха мах беш, Паччахьалкхен совгӀат далара.

Россе президента Путин Владимира даькъалавийцар вай мехкахо цу доккхача совгӀатаца, цо белгалдир юртбоахама даькъ тӀа хьувкъам лакха хилийтарах, хьалхале лелаю технологеш юкъеяхарах, цо дика дакъа дӀалаьца хилар.

«Къоастой Закречун Султангири - ший балха новкъосташта къахьегама даькъ тӀа дика масал да. Цун начӀало, хьинаро дукха пайда луш дола декхараш кхоачашде таро хулийт, цу юкъе лакха хьувкъам а кхебеш», - аьлар паччахьалкхен кулгалхочо.

Цо юкъедаьхача ший тайпара лаьттан Ӏунал дара хьалаша таро елар, юртбоахама даькъ тӀа боккха толам баккха. Цун масало хьагойт лакха профессионализм хилча, бӀарччача боахамашка кердадараш юкъедоаладе йиш йолга.

Ер деза совгӀат тешал деш да, лаьттанца беш бола болх- из духхьал професси хинна ца Ӏеш, мехка кхачан оагӀув кхерамзле йолаш хилийтара лоархӀаме декхар да. Къоастой Султангире истори - из низ чуболийташ дола масал да, ше дӀахьош дола гӀулакх дезаш хилар а, начӀал а, лаьрхӀачунга кхоачаш хилар а долаш, цо кхоачаву эггара лакхагӀча толамга.

ГӏалгӀайчен бахархоша, доаккхал а деш, белгалду, Къоастой Султангири ший хьамсара лаьтта дезаш, боккъонца вола ахархо хилар. Цун никъ механизаторгара Паччахьалкхен совгӀатага кхаччалца, сийрда масал да кагирхошта; цо чӀоагӀду, ше деш дола хӀама дезаш а, кӀаьд ца луш а из дӀахьош хилар, толам баккхарах тийша хилар.