ХӀаьта тахан царна дагадехар, кхоана доккха дика хинна дӀаотта тарлу вай мехка. Болам хиларах, гӀо деш хилар хьаллаца, даиман цу юкъе хила аьттув боал къонача тӀехьен. Студенташца, дешархошца дӀакхухьача кхетаченех доккха беркат доал, ишттача наькъаца гучабоал къаман вахаре хозача хӀаман тӀехьа хила, новкъостал ийшачоа сихонца оарцагӀбаха кийча бола кагирхой, бераш.

МоллагӀа дола хӀама, вайна ма харра, боаггӀача боараме а нийса а духьалдахьа начӀал хила деза, тӀаккха дикагӀа хьаллоац из ладувгӀараша. Шоай болх дика шаьрбаьча спикерашта хов, кхувш латтарий дегаш сомадаргдолча тайпара лекци дӀаяхьа, цар уйлаш, нигат тоаде. 

Ишттача наькъаца, гӀо деш леларий оагӀув хӀара денна шерлуш, дегӀабоагӀаш латт. Еррига терко берашта, хӀетта кхийнарашта тӀайохийташ дӀакхухьаш ба из болх тахан, хӀана аьлча мехкарча доккхача дикашта хьалхаотта безараш уж ба кхоана.

Кагирхой кхетачен ЦӀагӀа къоначарна лаьрхӀа керда доазош хьаделларо дикка тоаду из гӀулакх. Дикача, беркатеча гӀулакхий никъ цӀаккха а кхоачалуш, хадаш бац. Наха вахара оагӀонцара гӀо дара, Ӏалама моттигаш лораяра, СВО доакъашхошта, цар цӀагӀарча наха новкъостал лоаттадара, культураца ювзаенна йола вай мехкара моттигаш лораяра, иштта дуккхача кхыдолча гӀулакхашта тӀехьа шоаш дӀабовзийта йиш я кагирхой.

Шоай гӀулакх боаггӀача боараме, тӀехдика леладе Ӏомалуш ба уж хӀара денна, тахан Даьхен хьалхашкара шоай декхараш дика довзаш, кхетадеш хьабоагӀа уж, цунга хьежжа, къаман гӀулакха хӀара денна къахьега лаьрхӀа ба.