ИТ оагӏонцара дешар дега тоам беш хургдолаш дешара  ловзараш, ИТ гӏулакхаш дикагӏа довзийташ йола тренажераш, технологешца эша ловзара кӏийленаш   хьакхолла езаш хилар къонабараш.

Цу кхетаче дакъа лоацаш вар 30 тоабанцара 200 совгӏа доакъашхо. Магасерча «Ишкол 21» «Покемонаш» яхача тоабан доакъашхой дикка белгалбаьлар цига. «Покемонаша» ловзар хьакхеллар цига - кампус «Ишкол 21» Магас.  Кампусе гӏолла ИТ хьалхалений наькъаш довза,  ӏайха дехар чудалале, цигара дешар мишта латт ха аьттув лу цу гӏулакхо.

Чухьара болх дикагӏа байзачул тӏехьагӏа деша хьава догьоттаргдолаш оттадаь да деррига. Магасерча «Ишколе 21» шоай никъ тайп-тайпара болх бовзаш  дӏаболабир къонабараша. Цхьабараш программировани кхолла хьожаш ба, хӏаьта вожаш юххьанцара говзал йовза болалуш мара бац.

Хьехархоша белгалдечох, укхазара дешар лекцех латташ дац, проекташ хьакхолла, тоабанца къахьега, декхараш боаггӏача боараме кхоачашде ӏомалуш ба  къонабараш. Шу хьалха духхьашхара декхараш кхоачашде ӏомалуш мара бацар уж, хӏаьта тахан федеральни оагӏонца белгалбаьннаб. Цу гӏулакхо вайна хьагойт, лаьрхӏачунга кхача гӏерташ къахьегаш хилча, дикка гаьнавала йиш йолга.

Иштта болча кагирхой оагӏув хьаллаца, доккхача толамашка кхача царна гӏо де хьакхелла я мецената, бизнесмена Гуцаранаькъан Сафарбика Микаила «САФМАР» оагӏонцара «Таьрахьашца дувзаденнарий Академи». Тахан вай кагирхошта боккха аьттув луш моттиг я из, массане хам бе безаш.