Цу гӏулакха хьалхаэттараш яр мехкара кагирхой гӏулакхех йола Комитет; Магасера культурах, спортах, туризмах йола моттиг; Гӏалгӏай паччахьалкхен университет; иштта гӏо деш леларий моттиг. Керттера декхар - тахан кагирхошта юкъе спорт йоаржаяр, ха зехьа ца йоаяра уж тӏахьехар.

«Иштта йола кхетаченаш дӏакхахьар тахан къаьстта лоархӏаме да. Физкультуре, спорте бувзам болаш, дер дайна, пайда боацача хӏамашта тӏехьа ха йоаеш лелаш боацаш, хила беза вай кагирхой. Боаггӏача боараме цар из деррига кхетадергдолаш, къахьега деза вай. Шийна, иштта гонахьарча наха пайдане дола хӏама хьаллоацаш хилча, зехьа ха йоаяр  ше-ше юстардоал. Таханара кагирхой, бераш – вай сийрда кхоане я, из кхетадеш тахан нийса болх лоаттабе беза вай массане», - аьлар культурах, спортах, туризмах йолча Магасерча моттига кулгал деча Янданаькъан Абте.

Цу ловзаре кхоалагӏа моттиг «Инде пираташ» яхача студентий хӏинде тоабанна кхаьчар. Кхаь   бӏалах  чакхбаьлар уж цу наькъ тӏа. ИнгГУ тайп-тайпарча факультеташкарча студентех латтача тоабан кхаьчар дото майдилг, хӏаьта лакхерча лагӏа тӏа волейболах йолча Федераце тоаба эттар.

Цу гӏулакха хьалхаэттараша массанена дӏагойтар, спортивни яхьаша моллагӏча къамах бола, тайп-тайпарча ханага кхаьча нах шоайла вӏашкаозилга. Цхьан хӏаман тӏехьа латташ болча наьха массахана шоайла барт кхеташ хиннаб, из дар цу ловзаре теркалдаьр а.