Тахан, «Сердало» газета хаттарашта жоп луш я  ший гӏулакх дика довзаш йола говзанча, лор-неонатолог Элтемаранаькъан Мухьмад-Мирзий Зура, берий лора балха Республикански клинически перинатальни центра керттерча лора гӏонча.

- Зура, мишта дагадехар хьона лор хила, цу лоархӏамеча гӏулакха хьай вахар хетаде?

- Се  бархӏлагӏча классе ягӏача хана, сона ховш дар сайх лор хургйолга.  Со укх балха тӏа йоалайир наха новкъостал де безам болаш  хиларо. Наьха бала дӏаэца йиш хилар, вахар кӏалхардаккхар, зӏамигача унахочун новкъостал дар, цхьа бутт хьалха 700-800 грамм мара доацаш хинна бер,  низа чӏоагӏлуш, ший гаргара нах гӏадбугаш цӏагӏа чудаха йиш йолаш хилар дег чура салоӏам беш дола гӏулакх да.

- Мичахьа ӏомабир ӏа из болх?

- 2007 шера аз яьккхар Ростовера паччахьалкхен лорий университет, берий лора факультет. 

- Шун дезала юкъе е гаргача нахах саг вий из професси йолаш?

- Са даь-йиша яр республике цӏихеза лор, со яхар цун ларах.

- Малагӏа дешар дийша хила веза таханара лорий гӏирс лелабе ховш вола саг?

- Лорал цхьан моттиге латташ дац, из даим ӏилма ӏомаде дезаш болх ба, шийна ховш дар даим кердадоаккхаш, хила веза цу даькъ тӏа болх беш вола саг. Таханарча заман лор ха дезаш ва,  массадолча   лорий технически  гӏирсашцара  оагӏув лелае. Хӏаьта цунгара дӏадехар тийша да цун специализаци хиларах, цо дӏахьош долча гӏулакхага хьежжа. Цу юкъедоагӏа программан ӏалашонца болх бар, лорий балха даькъ тӏа.

- Тахан дарбанчешка дукха гӏирсаш, чоалхане хӏамаш я. Мел дика да МРТ яккхар унахочун лазар гучадаккхара?

- Нагахьа санна 18-19 шу хьалха, со МРТ болх бе йолалуча хана, из хӏетта хьадаьча берашта мара оттаеш хиннаеце, из а наггахьа мара йоацаш, тахан магнитно-резонансни томографи керттера дакъа дӏалоацаш я чоалхане лазар дий тохкача. Из иштта лелабеш болх ба Перинатальни центре. МРТ яккхаро таро лу юххьанца дӏадолалуш дола лазар гучадаккха, цунца цхьана дӏадоладу дарба.

- Тахан майрра ала йиш йолаш дий, вай республике тайп-тайпарча лорий урхалленашка болх беш начӏал дола лораш ба?

- Шеко йоацаш, тахан вай республике къахьегаш ба шоай гӏулакха мутӏахьа бола лерттӏа лораш, цар шоашта хьалхашка оттаду декхар да  - наха новкъостал дар. 

- Фуд шун балха халагӏдар?

- Се дӏаде гӏо доацаш йисар эггара халагӏа да сона.

- Тхона массаза хет; хургдолчун малагӏа уйла ю-хьогӏ цар, аьнна. Миштай шун уйлаш?

- Кӏай халат тӏадувхар  – из а саг ва. Цун а я ший уйлаш: балха тӏа ше эшаш хилар, ший къахьегам цхьаннена накъабаьннабий хар, дукхача хана денз сатийса бер ше кӏалхардаьккхадий хар.  Кхы а сона ловра дикача  говзанчаша  из дика никъ шоашта харжар - неонатологаш царех  хилар.

Ха дӏагӏоргья, оаха тешамеча кулгашка дӏалургда, цу дикача лорашка тхоай зӏамига бераш.

- Фу аргдар ӏа, хӏанзчул тӏехьагӏа  шоай професси харжа езаш болча кагирхошка?

- Лор - из тӏахьехам ба. Из професси шоай даьшта езаш яр, аьнна, цӏаккха а ма харжа. Лор хила веза, ше дунен чу ваьлча денз. Из никъ хоржаш болча наха ха деза, цхьа ха  йоагӏаш хилар, шоай професси гаргарча нахал лакхагӏа оттае езаш.

- Баркал хилда хьона, Зура,  боккхача къахьегамах. Ираз, аьттув хилба хьа а берригача лорий а, цу лоархӏамеча балха даим лакха толамаш а доахаш, могаш долаш, дӏадаха низ кхоачалба.