Россе президента Путин Владимира, шийна тIадехка керттерадараш кхоачашдеш дIаболабир ший болх хьакима. Цу юкъе дар, газификацех лаьца лоархIамедараш. Вице-премьер вIашагIкхийтта хилар республикерча бизнесменашца. Дийцар, мехка беркате хургйолча инвестпроектех. Республикера социально-экономически хьал тоадара тIехьа дIахьоргдолча гIулакхех дийцар, Москвера венача хьакима, вай Мехкдаьца.

Келматанаькъан Махьмуд-Iаьлас доккха баркал оалаш къамаьлдир Новак Александрага республика гIо деш хиларах

«Дуккхаза дIакхихьай Iа тха регионера хьал, федеральни оагIон тIара эшаш дола гIо-новкъостал дувцаш йола кхетачеш. Къаьстта цу гIулакхо, тхона дуккхача хIаман тIехьа аьттув беннаб. ДIаьхача шерашка тоаде таро йоацаш лаьттараш, меттадоаладаьд оаша даьча новкъосталца. Оаха кхетаду, Россе президента, тха республика оагIув хьаллоацаш доккха гIо делга. Къаьстта, коронавирус яха лазар даьржачул тIехьагIа, дуккхача дезалашта новкъостал даьд. Из тха наха боккха аьттув луш да, хIана аьлча, тха республикера дезалаш дукха бераш долаш ба», — белгалдир Мехкдас ший къамаьла юкъе.

Республика федеральни оагIоно лоаттадеш дола гIо, ший даха доаггIача тайпара дIадохийтаргхиларах шеко яц аьлар, Келматнаькъан Махьмуд-Iаьлас. Цу гIулакха оаха тIахьожам лоаттабергба, массе хана, ший хила беззача боараме.

«Таханарча дийнахьа тхона хьалхашка латта керттерадараш — экономикан хьал тоадар, ма хулла, наха болх бе моттигаш Iалашъяр, республика беркате хургйола керда проекташ хьакхоллар, хIара сага вахара хьал, низ дIамакхоачча, тоадар. Из хьал дикача оагIорахьа тоадара тIехьа, дукха къахьегаш низ Iобила беза», — аьлар Новак Александра.