Беркат даржар
Бетта 20 тонн совгӀа кхача луш, хургья вай шурий комбинат
Мехка чӀоагӀа лоархӀаме бола гӀа баьккхар тахан республико! Юртбоахама, экономикан хьал дикка тоадеш хургья МагӀалбике хьайийлла маша даараш арахецаш йола моттиг. 20 тонн совгӀа кхача арахецаш хургья цех. Шура, йогурт, кӀолд, нахча, даьтта, ета шура, иштта кхыбола кхача воай мехкара эца аьттув хургба вай, Даьла къахетамца. Из хоам «Сердалога» бир Мехкадаь зарбан болх лелабераша.
ГӀадвугаш да, хьатӀадоагӀача цу керда хьайийллача моттиге маькх, хьоарах даь тайп-тайпара даараш арахеца лаьрхӀалга. Мехкарча экономиканна доккха дика дергда цу гӀулакхо.
80 сага болх бе моттигаш лургья кердача цехо. Вай Мехкадас Келаматанаькъан Махьмуд-Ӏаьлас белгалдир, 2030-ча шера экономикан хьал дикка айденна хила деза, аьнна, РФ президента Путин Владимира яь чӀоагӀо хьаллоацаш из гӀулакх хилар. Маша даараш арахецаш йола моттиг тахан воай доалахьа хилар, хам баь варгвоацаш, доккха беркат да. УнахцӀена кхача тахан воаш дахачара ийбе йиш хургья вай, хӀаьта ший мехка хьадаьча хӀаманга хӀама кхоачаргдац!
