Парке йоагача вIалла дIайовш йоацача цIера юхе гулбелар: хьакимаш, Iаьдала болхлой, депутаташ, бахархой. Мехкдас хозача дешашца доккха баркал оалаш даькъала бийцар, Коталон ди даккха гIерташ лаьттараш, цар цIагIара нах.

«Аз доккха баркал оал шоай вахара уйла ца еш Коталон ди гарга доаладе гIерташ лаьттарашта. Ер маьрша вахар вайна даккха гIерташ тIом баьрий хам баь даргдац вай цIаккха а. Коталон ди — Россе хIара вахархочунга кхоачаш дола доккха, беркате ди да! Укх дено дицдалийтац вайна тIема истори, даьша фашист вохавеш хьабена хала никъ. ТIема шерашка вай къаман наха дIахьекхад шоаш мел чIоагIа Даьхенах дог лазаш, цун га Iодуларгдоацаш нах ба. Вай тIема истори дIаьхийи, сийдолаши да! Цу майрача наьха цIераш вай дегашка яхаргья массе хана», — белгалдир Мехкдас.

Иштта Мехкдас хьоахабир таханарча дийнахьа денал гойташ латта вай кагирхой. Шоай декхараш дизза кхоачашдеш хьабоагIа уж Россе тайп-тайпарча миIингашка. Геттара чIоагIа лоархIаме да вай кхувш латтача тIехьенна из истори довзаш хилар. Гулбеннарашта юкъе дукха кагирхой, бераш дар. Мехкдас доккха баркал аьлар цар хьехархошта, даьшта, ноаношта. Из деррига хьалхадоаккхаш, шоай селхане йовзаш уж кхебар доккха гIулакх да аьнна тIатехар. ТIема шерашта хетадаьча гойтама белхашка хьожаш чакхваьлар Мехкда. ХIара сага дог сомадоаккхаш дар гонахьара сурт. Митинг йисте йоалаш «ГIалгIайче Россех дIакхийтта 250 шу» яхача юбилейни майдилгаца белгалбир вай мехкара афганцаш. ГIалгIайчен гимнага ладувгIаш лаьттар берригаш. Беркате хилда вай къаман вахар, массе шерашка!