Вай мехко цӏаькха а гойтар, республике къахьегараш бокъонца бола говзанчаш болга. Уж лакхача боарам тӏа яхьебала  таро йолаш ба.

Шолжерча 386203 почтан водитель Марзбиканаькъан Мурад котваьлар СКФО куран яхье. Цу гӏулакхо цунна бокъо лу вай мохк Москве дӏахьоргйолча  ерригроссийски яхье гойта.

Ставрополе яхь дӏахьош хиннача куран даькъ тӏа, Гӏалгӏайчен почта болхлоша массехк совгӏат даьккхар. Ший болх дика бовзаш, лакха кийчо яь хиларах, Наьсарен 386121 почтан бувзама даькъа оператора Дебаранаькъан Маринас, Дзовранаькъан Зейнапа йийкъар шоллагӏа моттиг. Дика толам гойтарах Магӏалбика 386310 почтан болхло Болотова Марина лауреат я. Цу тайпара, Гӏалгӏайчера виъ доакъашхо совгӏаташ дахьаш цӏавера. Цу толамо доаккхал дайт вай мехкахоех.

Яхьаш тайп-тайпарча доакъоех латташ яр. Техкар доакъашхой   теоретически говзал, практически кердадараш гойтар: корреспонденцеш кийчъяра сихал, каьхаташцара болх, керттера болх бовзаш хилар, хӏаьта водителаша – технически кийчо.

«Из вай болхлой хьалхара котало яц, цар кхыча  ерригроссийски яхьашка а  коталон моттигаш яьхай, цу даькъе ерригача Россе дикагӏа болча доакъашхошта юкъе а. Сона дика хет, Мурада, Зейнапа, Дебаранаькъан Маринас, Болотова Маринас лоархӏаме моттигаш яьха. Геттара сий долаш да тайп-тайпарча балхий говзанчаш котбоалаш хилар: водителаш, оператораш, почтальонаш, доакъой кулгалхой.

Хӏара боахаме балха говзал лакхъеш хилар гуш да. Тхо тешаш да, ерригроссийски яхь дӏахьош;   Мурада дика толам боаккхаргба, аьнна. Доаккхал ду вай тоабах!» – аьлар, шийна хетар дувцаш, Гӏалгӏай Республикан почтан бувзама Федеральни Урхаллен кулгалхочо Гаьгенаькъан Ислама.