«Кремле тха вӏашагӏкхетар долаш, Россе Президента Путин Владимира белгалдир, лаьрххӏача операце бӏухой, цар дезал хьаллацара массайолча оагӏорахьара новкъостал лоаттаде дезаш хилар. Из керттера декхар да республикан ӏаьдала, ерригача моттигашта, иштта сона а. Са каст-каста вӏашагӏкхетар хул СВО доакъашхошца, ветеранашца, цар дезалашца. Цу тайпара кхетаченаш хиларо таро лу цу дезалашкара хьал довза, наха фу эш ха. Цар сайна тӏадена хӏара хаттар кхоачашде хьож со, хӏаьта цу юкъе диса цхьадола хаттараш кхоачашдара тӏахьожам а лоаттабу, уж чакхдаллалца. Тха декхар - лаьрххӏача операце хӏара доакъашхо, цар дезалаш даим паччахьалкхен оагӏорахьара шоашта новкъостал лоаттаделга хоалуш хилийтар, шоай хаттар терко ца еш дусаргдоацилга царна дӏагойтар», - аьлар Гӏалгӏайчен Кулгалхочо Келматанаькъан Махьмуд-ӏаьлас.

Республикан Кулгалхочо белгалдир, «Даьхен лорабой» ганза филиала керттера дакъа дӏалоацаш хилар, СВО доакъашхошта новкъостал деча. Вахара оагӏон болхлоша царца даим бувзам лелабарах, моллагӏа хьалхашка нийсденна хаттараш сиха кхоачашде таро хул.

«Тхона лоархӏаме да, цар кхайкарал техка а ца ӏеш, вай бӏухой, цар дезал кхача безача дӏакхачийтар, шоай хаттар кхоачашдара наькъ тӏа уж бахар, царна уллув хилар», - аьлар Келаматанаькъан Махьмуд-ӏаьлас. - Сога каст-каста язду республикан бахархоша; меттаоттавара центрай, ветераний Цӏен балхах лаьца; цигара дика хьалаш, говзанчий терко хиларах дувцаш. Цу тайпарча хоамо гӏадвуг, цо хьагойт оаха из болх, нийса вӏашагӏбелла, уж хьаллоацаш йола оагӏув йоагӏача беса хилар, из дӏахо дӏаяхьа езилга».

Карарча шера кӏимарса бетта 1 ча денга кхоачаш даима «Даьхен Лорабой» Паччахьалкхен фонда урхаллено терко лоаттаеш ба республикан 1357 саг. Социальни болх лелабераша ца хадаш царца болх беш ба. Цу списка чубоагӏаш ба 238 тӏем тӏара цӏа бехка ветеранаш, цу юкъе 81 саг заӏапхо ва, тӏема декхараш кхоачашдеш човнаш хилар бахьан долаш цар могашал яйна хилар чӏоагӏдаьд.

Цул совгӏа, уж бахача моттигашка дӏа а долхаш, новкъостал лоаттадерех ба 671 бӏухой гаргара нах, хӏаьта бӏухой шоаш хӏанз укх сахьате тӏема хьалхарча мугӏарашка латт. Цу тайпарча таьрахьий масал доаладу Гӏалгӏайчен Кулгалхочо.

Карарча шера хьалхарча ялх бетта, ганзера новкъостал дезаш вера 766 саг. Уж баьхка хилара бахьанаш вахара оагӏонца болх лелабераша лаьрххӏа дӏачоагӏдир 682 дехарца. Царех 664 таханарча дийнахьа кхоачашдаьд. Цу тайпара, хьалхашка нийслуш дола хаттараш кхоачашдара болх «Даьхен лорабой» ганза республикан филиало 97,3 процент кхоачашбир.

Дукхагӏа ганзе хьабоагӏача наьха хаттараш дувзаденна да мах боацаш лаьтташ дезаш хиларца, иштта шоашта доагӏаш дола ахчаш хьадоладарца, психологически новкъостал дезарца, Даьхен бӏухо венна хилар чӏоагӏдеш тешал дезарца, иштта венна бӏухо дӏаволлаш таьзет дӏадахьа новкъостал дехараш а хул.

Керттерча декхарех да, СВО тӏема даькъ тӏара цӏабаьхкача бӏухошта массайолча оагӏорахьара гӏо дар, уж шоай маьршача вахарга бахар. Укх шера лаьрххӏача операце 35 ветерана болх лаха новкъостал дир, царех виъ могашал эшаенна ва.

Гӏалгӏайчен массайолча шахьарашка, кхаленашка СВО доакъашхошта лаьрхӏа меттаоттавара болх боаржабаьб. Ерригача гӏишлошка хьалхале лелаю лорий техника я, царна дарба деш ба говзал лакха йола лораш. Цунца цхьана республике дегӏадоаладеш да Даьхен бӏухой могашал тоаяра хьалаш - керттера унахцӏено тоаяра дола Сурхо тӏара ветераний Цӏа. Из тахан чӏоагӏа накъадоалаш да. Из иштта хилар хьагойт таьрахьашца. Духхьала дӏадахача шера, СВО 90 гаргара саг укхаза санаторно-курортни дарба деш хилар, шоай могашал чӏоагӏъе таро хилар цар.

Паччахьалкхено, юкъарлоно; шоай са кӏалъоттадеш, мехка кхерамзле лораеш латтача бӏухошта; цар гаргарча наха юха лу ший декхар. Иштта лу бӏухошта, цар дезалашта тешшаме кхоане. Цунца гуш да юкъарлон цхьоагӏо хилар, моллагӏа йола халонаш Даьхен хьалхашка нийсъяларах духьалъотта низ кхоачаш хилар.