Бокъо йоаца доккха таьрахьаш леладеш ахча лархӀар
СКФО доккхийча таьрахьашка доахаш ахча лархӀара духьалара болх чӀоагӀбе, аьнна, тӀадиллар президента викала
Мехкий кулгалхой, федеральни министерствошта хьалхалаттараш, Ӏаьдала болхлой гулбаь; кхетаче дӀайихьар РФ Президента СКФО гӀолла волча массазарча викала Чайка Юре. Кхетаче дийца керттердар - СКФО доккхий таьрахьашца дувзаденнача ахчанца болх боаггӀача боараме, Ӏаьдала бокъонех хила беззача тайпара дӀаоттабар. Из гӀулакх чӀоаггӀа айлуш латтара духьала болх дӀабахьа безилга белгалдир Ӏаьдала болхлоша. Из хоам «Сердалога» бир Мехкадаь, Паччахьалкхен зарбан болх лелабераша.
Чайка Юре белгалдир, доккхача таьрахьий ахчанцара гӀулакх (майнинг) айдалар кӀезига хӀама дӀадодаш, дикка дукхагӀа хьатӀадоагӀаш хиларца дувзаденна да, аьнна. Бакъда тахан из гӀулакх иштта паргӀата доаржаде йиш ярех дац, боккха кхерам ба цунгахьа. Масала, бокъо йоацаш дӀахьоча операцешта, терроризм яхача зулама лаьрхӀа ахча дӀатӀакхийта йиш я зуламхоша ишттача наькъаца.
Цул совгӀа, бокъо йоацача тайпара ишттача ахчан таьрахьашца леладеча гӀулакхо мехка экономикацарча кхерамзлен доккха зе де йиш я. Цул совгӀа, кхетаче хьоахадир, СКФО ток лечкъаерашта цу лостамагӀа болх лелабар аьттув болаш хулилга. Президента викала Ӏаьдала болхлошта, тока оагӀон къахьегамхошта тӀадиллар Ӏалаьмате чехка цу гӀулакха духьала болх дӀаболабар.
МВД болхлошта тӀадиллад бокъонаш телхаеш из гӀулакх леладерашкара гӀирсаш хьадоахаш, уж увттадеча дакъа лоацаш мел бола нах бехктокхаме оза, аьнна. Цу тайпара хӀара гӀулакх массанена дӀадовзийташ, бокъо йоацарех долга дӀахайташ, хоададе аьнна тӀадожадир. ХӀара мехка хьалхашка декхараш оттадеш дӀайихьар кхетаче. Воккхача хьакима белгалдир; тӀадехка декхараш кхоачашдара тӀехьа боккха тӀахьожам лоаттабергба, аьнна. Къилбаседа Кавказе цу хӀаман духьала федеральни оагӀоно боккха, лоархӀаме болх чакхбоаккхаргболга белгалдир Чайка Юре.
