«Сердало» газета корреспондентаца къамаьл деш, УФПС кулгалхочо Гаьгенаькъан Хаматхана Ислама дийцар, дӏадахача шера шоаш балха тӏа даьхача керттерча толамех, шоай хьамсара мохк дегӏабоалабеш къахьегаш йолча тоабанна юкъедоаладаьча кердадарех.

- Малагӏа бахьан да Гӏалгӏай Республикан Федеральни почтан бувзама Урхаллено толамаш дахара?

- Нах керте латт, дӏадодача шера толамаш дахара. Из тхона карагӏдаьлар ерригача тоабо ший болх дика вӏашагӏбелла дӏахьош хиларах, профсоюза организацеца бувзам лелабарах, цо таро лу профессиональни дегӏаахара, иштта болхлой хьашташ лораду.

- Сенца дувзаденна да уж толамаш?

- Гӏалгӏай республикан УФПС, наджгоанцхой бетта денз тов беттага кхаччалца, берригача мехка дикагӏчарна юкъе яр. Оагӏой бетта, тхо кӏеззига тIехьа хилар, пхелагӏча моттиге доалаш. 2025 шера 9 бетта республикан почтан бувзамга гӏолла чакхдаьлар I,95 миллион почтага гӏолла деш дола гӏулакхаш. Из болх дукхагӏча даькъе таьрахьий хьалашца беш хиларах, тӏакхийтар мехка «Россе Почта» яхача мобильни бувзамга гӏолла уж хьалаш леладераш 47 % - 96 эзар хӏара бетта.

- Малагӏа кердадараш белгалдергдар Iа шоай балха даькъ тӏа?

-Керттера хилар Китай мехкара мухь сихагIа хьакхачарца дувзаденна хьалаш хьакхоллар. Цар товар хьадахьаш дӏалоацараш 12 ди мара дац, цу юкъа из хьакхоач Подмосковье, дӏахо Гӏалгӏайче хьадоагӏа. Уж хьалаш эшаш да зӏамига, юкъера бизнес лелаерашта. Кхы кӏезигагӏа лоархӏам болаш дац Wildberries заказаш дукхагIа лоаттадара йола таронаш хьакхоллар. Республикан почташка дӏахо хьаеллаш я йоккхагӏа йола, мах бара оагӏон дехар дӏалуш йола пункташ, из наха дика аьттув болаш да. Таханарча денга кхоачаш, республике 49 цу тайпара моттиг болх беш я.

Цул совгӏа, «Почта-Банк ВТБ-ца» яха оагӏув юкъеяккхарах, наьха таро я банка хьалаш ма дарра леладе почта доакъошка.

- Салоӏа денош долча хана почта балха юкъе нийслой болх ца беш йола моттигаш?

- Пенсеш, вахарца дувзаденна кхыдола ахчаш дӏадалара болх оаха юхасоцабаьбац оагӏой бетта. Кердача шера цӏайш долаш дӏабахьа беза болх оаха хьалххе а вӏашагӏбеллабар: нах дукхагӏа арабаьхаб, транспорт я болх беш, дика лелаю QR-кодах хӏама дӏаялара хьал. «Гӏор-Дадега дохьийта каьхат» яха массазара болам дӏабихьар Кулиева урамах, 20-А отделене, оагӏой бетта 31-ча денга кхаччалца.

-Мишта дӏайихьар оаш, Сийлахь-боккхача Даьймехка тIема Коталаон 80 шу дизара, Даьхен Лорабой шу хилара хетаяь «Почта, фронт» яха берий суртий яхь?

- Почта болхлоша берашта лаьрхӏа вӏашагӏъеллача яхье, 7-14 шераш даьнна бераш дар, къона суртанчаш дакъа лоацаш хилар цига. Дукхагӏа из дӏахьош хилара бахьан дар, вай кхувш йоагӏача тӏехьенна эхь-эздела мах бараш довзийтар, Даьхенцара цар безам совбаккхар. Чаккхе еш хинна пресс-конференци йистейоалаш, оаха цига дакъа лоацаш хиннарашта дагалоаттама совгӏаташ, дипломаш делар.

Дӏаяхача турпала ханашка, тӏема шерашка почта баьча балха хетадаь сурташ дег чура даьхка хилар а гуш дар.

- Шун балха тоабо 2025 шера дукхагIча теркамца белгалдаьраш малагIаш дар?

- Укх дӏадахача шера керттера терко лоаттайир исторически дагалоаттам лорабара, Даьхен лорабой хьаллацара йолча проекташта. Магасе лаьрххӏа йола кхетаче хилар, Гӏалгӏай республикан кулгалхочо Келаматанаькъан Махьмуд-ӏаьлас дакъа а лоацаш, Сийлахь-боккхача Даьймехка тIема Коталон 80 шу дизара йола почта мваркай блок лаьрххӏа тIаэцаш яр цига.

Цунца цхьана СВО доакъашхой, цар дезал хьаллоацаш болх дӏабихьаб. Бейнача бӏухой гаргара нах бахача моттигашка белггалара новкъостал лоаттадаьд. Тхо иштта хьежар СВО бӏухой дезалашта лорий новкъостал лоаттаде.

- Юххера а, вай къамаьл чакхдоалаш, фу аргдар ӏа додахача 2025 шера баьча балхах?

- 2025 шу тхона лоархӏаме хилар, таханарча заман хьалаш юкъедаха таро хиларах. Оаха баркал оал тхоай болхлошта, цар шоай болх дика барах, хӏаьта республикан бахархошта - тешам баларах. Хьалха латташ керда декхараш да, кхоачашде дезаш. Гӏалгӏайчен хӏара вахархочунга дика хьалаш дӏакхачийтар, балха дикал лакхъяр лоархӏаме да тхона.

- Ислам, баркал хилда тхоца къамаьл дарах.Хьа а хьа балха новкъостий а аьттув балба; хьалхашка латта декхараш кхоачашде; могашал, ираз хилда шун.