Хьаькъала толам
ИнгГУ хьехархочо Дзорматанаькъан Бек-хана дийцар ӀТ таронех
Бек-хан, российски вуз яккхарал совгӀа, халкъашта юкъера программа Ӏомае шозза США ваха хиннав. Цул тӀехьагӀа, ГӏалгӀай мехка болх беш воллаше а, цун таро хилар эггара дикагӀа лоархӀаш йолча Америкерча Гарвардски университете деша отта. Цо кхоъ балха говзал Ӏомаю, бӀарчча дешара курс а йоаккхаш, цун тешал деш да вай мехкахочоа денна дипломаш.
Ше цига Ӏомадаьр Бек-хана накъадоал хьехархочун балха. Студенташта хьехарал совгӀа, из ва ГӏалгӀайчен ерригача шахьарашка филиалаш йолча берий ӀТ Coddy ишкола, Solvo дешара центра кулгалхо.
Дешар вӀашагӀделлараша яхачох, Coddy - из бераш программировани Ӏомаеш, ловзараш, юхедуллараш хьакхоллаш, зӀамига болча хана денз ӀТ дуне довзаш йола ишкол я. Уж курсаш бахьан долаш, цар хьаькъал совдоал, кердача вахара никъ хьаэц, тоабашца цхьана бола болх дӀабахьа Ӏомалу. Дзорматанаькъан Бек-хана яхачох, таханарча заман говзанчаш, шоай керттера болх дӀахьош хиларал совгӀа, компьютерца, наха кхеллача интеллектаца, нейросетешца болх бе ховш хила беза, вай заман сага ца хайча яргйоаца балха оагӀонаш я уж, моллагӀча балха даькъ тӀа вале а.
Программиста балхах аьлча, вай мехкахочо Гуцаранаькъан Микаила аларах, тахан Магасе хьайийллача таьрахьашца дегӀаахара Академе деша таро хиларо, балха эггара кӀоаргагӀа йола оагӀонаш йовзийт. Цо, гӀулакхацара говзал лакха йола саг хила новкъостал ду. Уж говзанчаш, вай мехка меттел, доазол арахьа а эшаш ба.
