Хала да дега, тахан из вайна юкъе воацаш хилар кхетадеш, язде. Хьалхарча вӀашагӀкхетаре оаха дийцар, спортсмений дегаш ураоттаргдолаш, кхы а дикагӀа шоай гӀулакх леладе цар безам хургболаш, мишта яздича бакъахьа да. Цо кхебаьча спортсменашта юкъе ба берригача мехка вай къам дӀадовзийта бола спортсменаш: Чахкенаькъан Рахьим, дерригача дунен чемпион Котанаькъан Ахьмад, СССР хьалхара чемпион Джаниев Ӏумар, иштта кхыбараш.

Уж берригаш вай ГӀалгӀайчен цӀи дӀайовзийташ, вай массане дегаш гӀоздоахаш йола котало йоаккхаш лаьттаб. Боксах, кикбоксингах вола Россе цӀихеза тренер, Россе физически культуран гӀорваьнна болхло вар Руслан. ЧӀоагӀа оамала атта, хоза къамаьл долаш, ше везавалийта ховш, дика саг вар из. Боксах мел дараш дика довзаш вар из. Цул совгӀа, шийгара юкъедихьа, латархошта геттара накъадоалаш хӀамаш дар цун боксе.

ЧӀоагӀа дог лазар цун вай къамах, мехкахоех. Харцача хӀаманца къувсаш, къаман гӀулакх тоадалар кхераш болча нахаца тӀом лоаттабеш, чакхваьлар из. Вай къаман хӀама мел лоархӀаме, лорадеш, доаккхал деш леладе дезарех да дӀахайта гӀертар из массанена. Ше хеставеш хилча, юхьдухьала айвеш хилча юстарвувларех, эхь хетарех вар Руслан. Хала таро йолаш вахаш, дикка ха яьккхар цо.

ЛерттӀа чуӀе моттиг йоацаш, дуккхадараш эшаш ше вале а, вӀалла догьэккхацар цун нахах, вахарах. Ший никъ цӀена лелабеш дӀаводе, деррига меттаоттаргда, аьнна, хетар цунна. Кхыча моттигашка болх бе дӀавехаш нийслора из дуккхаза. ЧӀоагӀа дехар дора цунга, кхыча субъекташкарча наха; шоай спортсменаш Ӏомабе хьавола, яхаш. Цун мел эшаш дола хӀама дала, вахара хьал тоаде кийча бар уж. Бакъда Руслана хьатӀаэцанзар из никъ. Ший къаман хӀама деза дар цун дега.

ГӀалгӀай кагирхой Ӏомабе ловра цуннна. Яхьашка, чемпионаташка хулаш дола цхьаццадараш дувцар цо. Ма барра из никъ дӀабовзийта гӀертар из мехкахошта. Моттийта, дега тоам халийта даьсса хабар дувцарех вацар Руслан. Ший балхá, кхыбарий къахьегамá чӀоагӀа тӀахьожам лоаттабора цо. Хьакимашта, цу мугӀарерча наха товр дувца ца гӀерташ, бакъдолча хӀаман тӀехьа латтар из! 30 шера цунца гӀулакх леладеш, цун дега хьал, уйлаш дика яйзар сона.

Тамашийна саг вар из, чӀоагӀа ловш вар къахьега! Дуккха зӀамагӀа волча хана денз, дукха спортсменаш, тренераш бовзаш хила аьттув баьннабар цун. Ма дарра аьлча, ший дог Ӏодилла, къахьийгар цо ше Ӏомабеш бола спортсменаш лакхача лагӀа тӀа баха гӀерташ. Дунен чемпион спортсменах ве мел хала да ховча наха кхетадергда аз дувцар. Дунен цӀихезача тренерий хинна аьттув Чопанаькъан Руслана хиннабаларе, ше Ӏомабаьча спортсменашка хьаяхийта хургьяр цо спорта вахарера еррига лакхаленаш.

Цунна ма хетта хиннадаларе, дерригача дунен цӀихеза бола чемпионаш вай къаман шортта хургбар. Иштта бола нах тахан кӀезига ба вайна юкъе. Ший гӀалат теркалде, кхычар харцахьа даьр тоаде ховра цунна. Ше декхарийла вола гӀулакх чӀоагӀа бехктокхаме дӀадахьа хьожар из. ХӀетта кхийнача кӀаьнкех боккъал башха говзанчаш хьабе гӀертар из. Спорта вахар ца довзача наха еш хинна духьале йохаеш, дуккхача хӀамашца къувсаш, дукха низ боабеш, дӀабихьар цо ший никъ.

Мел дукха шераш дӀадахадале а, цкъа шийна вайза саг вицлацар цунна. Хаттар дийя, цун вахара никъ байзе мара дӀаводацар. Беркате оамал яр из - нах дагалоаттабар. Ира хьаькъал долаш, чӀоагӀа хӀама зувш саг вар Руслан. МоллагӀча темах къамаьл дувца йиш яр цунца: мехкарча хьалах, политиках, кагирхой кхебарах, кхыча мехкарча вахарах, хьоалчагӀех, машен эцарах, иштта дуккха кхыдарех а. ХӀара сага укх дунен тӀара ха, цкъа кхоачаяла езаш я.

Шийна тӀехьа сийрда лар йитар - из да-кх керттердар! Эздий нах къаман вахаре бах дуккхача шерашка, тӀехьа тӀабоагӀарашта хоза масал долаш. Цар цӀераш йицъе бокъо яц вайх цхьанне! Ишттачарех вар Чопанаькъан Руслан. Дерригача дуненна вай мохк дӀабовзийта тренер, дика доттагӀа, эздий гаргара саг. Вай урамаша, стадионаша, спорта ишколаша лелае еза цун сийрда цӀи!

Дала гешт долда цунна! Ялсмален хьаьша волва цох Дала!