Ара моллагIа тайпа хаоттам мара ца хилар шоай болх дIабахьа кийча болаш, са тассарца наькъаш цIенъдеш, лостам беш, тоадеш хул уж беркате нах. ЦIагIа вагIа а хала йолча Iи мерцача йIовхала вайна наькъаш тоадеш хул уж, тахан, ара шелал, догIаш эттача а шоай моттиг лораеш новкъа лел. Доккха баркал оалаш цар къахьегам белгалбеш къамаьл дир вай Мехкдас Келматнаькъан Махьмуд-Iаьлас, «Экажкъонгий-Юрт — Iаьлий-Юрт» яха тоабаь никъ хьабелача дийнахьа. Наькъашка машенашца лелараша а дукха ловцаш доахаш, баркал кхайкадеш хьоахабу уж нах.

ХIара дийнахьа дIа-хьа ухача нахал дикагIа хьанна бовзаргба цар болх.... Укх каь шера «Кхераме доаца дика наькъаш» яхача къаман проекте гIолла цаI йисте баьлча, шоллагIа никъ тоабеш къахьегаш ба вай мехкара цу даькъ тIара болхлой. ХIара денна цIенду наькъаши, наькъа оагIонаши нувхех, кIоагаш дIадукъаш болх дIакхухь.

Цу гIулакха оарцагIбаьнна лелача болхлоша яхачох, наькъашкара санитарни хьал лорадар эггара лоархIамегIачарех дола гIулакх да. Кулгашца болх барал совгIа йоккхий машенаш араяьхий царца цIенъю цар моттигаш. Ма хоза а хет-кх, чуийнна болх беш боахкача, шоаша леладер лоархIаш болча цу наха бIарахьежаш латташ. Шоай декхараш тIехьдика чакхдахарал совгIа, геттара лакха мах оттабе безаш да цар хоза йист хилар, эхь, эздел лорадеш хилар.

Ма даггара дIа-хьа ухача машенашта юкъе болх беш валла атта дац. Бакъда, уж нах цIаккха а чура баьле, айхIаза къамаьл деш хьовзац. Хоза бела а балий ловцаш доахаш, лоралуш хилар дехаш тIехьа кхайк уж. Цу наха хьегаш дола къа, цар тохаш дола са теркалдеш хила деза вай дерригаш а.

Атта болх бац цар бар, деце а, вайна массанена товр де гIерт уж. Вай лела наькъаш да цар лостам беш лорадераш. ДIайхача цIагIа вай дагIача деношка, уж ма даггара бел хьокхаш къахьегаш хул. Мехкхой, хам бе беза вай цу хIаман! АллахIа маьрша, иразе доахадолда шо!