«Мехкарча 40 ишколе 1 360 ноутбук, 120 видеокамера, 120 телевизор, 40 интерактивни улг, 40 тайп-тайпара дукха балхаш леладе йиш йола гӀирсаш оттадаьд. БархӀ «ДегӀабара тӀадамаш» хургда Магасерча, Сурхо тӀарча, Эккажкъонгий-Юртарча, Инаркъерча, Йоккхача а Юкъерча а Ачалкхенашка. Таханарча хано дӀадеххача тайпара йолча химех, биологех, физиках йолча лабораторешка къахьегаш, цхьацца кердадараш довза аьттув хургба вай берий», - яздир ший телеграм-оагӀон тӀа вай Мехкадас Келаматанаькъан Махьмуд-Ӏаьлас.

Кхы а дукха дикахетараш да берашка хьежаш вай ишколашка. Наьсарерча №1, Илдарха-ГӀалий тӀарча №6 йолча гимназешка хьаелларгья кванториумаш. Ӏилман, технически балхаш леладе аьттув хургба берий цига. ӀT оагӀонца къахьегаш дола бераш хӀара денна дукхагӀа хулаш латт.

Тайп-тайпара керда хӀамаш доаржаде, шоай проекташ кхолла йиш хургья дешархой. Вай Мехкадас белгалдаьчох, кванториумашка хургда бе-бе Ӏилманцара, техникацара берий кхетамаш лакхдеш дола хӀамаш.

Берий технопаркех начӀал дола бераш, кагирхой тӀалатта моттигаш хургья. Цу гӀулакхо кхебергба вай мехка накъабаргбола, беркате гӀулакхаш доаржадеш бола бахархой. «ӀT-Куб» яха таьрахьий дешарах йола шоллагӀа моттиг хьаелларгья республике, дешара шу долалуча дийнахьа. Из беркате болх хургба Наьсарерча №6 йолча ишколе.

Мехкара хьалхара «ӀT-Куб» хьайийллар дӀадахача шера Шолжа-Шахьарерча №1 йолча лицее. ЧӀоагӀа беркате совгӀаташ хьеж спортсменашка а!

Дешара шу хьатӀаотташ, республикерча ийс ишколе спорта эшаш йола керда хӀамаш оттаергья.

Дешархошта тоадаьд ялх воркаут-доазош, футболах ловза моттиг. «Дешар» яхача къаман беркатеча проекто дукха хоза хувцамаш деш латт мехка, хӀаьта цу гӀулакхо дега боккха тоам бу.