Эггара хьалхарча оагIонца дувца оттадир терроризм, экстремизм яхача зуламашта духьала дIахьош болча балхах. Администраце кулгалхочун гIонча волча Новразанаькъан Темарлана дийцар цу оагIонца кхоачашдаьрех. Шахьара администраце болхлоша, депутаташа тахан боккха болх вIашагIбеллаб, къона тIехье нийсача наькъ тIа яккхар духьа.

Дукха ха йоацаш кхален культуран цIеношка дIакхихьар терроризм яхача доккхача зулама духьала къовсам лоаттабарах йола кхетаченаш. Хьехархоша, боккхийчар тахан боккха болх ба кагирхошца беш латтар.

Терроризм яхача зулама духьале еча Денна хетаяь кхетаче дIайихьар Шахьарерча № 1 йолча ишкола дешархошца АТК секретарь, ПДН инспектор, ЦПЭ болхло, иштта дийша нах юкъе болаш. Кхален бахархошца бувзам лоаттабара тIехьа лоархIаме моттиг дIалоацаш я «Къахьегама байракх» яхача газета редакци.

Газета керттера редактор йолча Хьакхенаькъан Мовлатхана кхетаче дийцар, газета оагIонашка гIолла тахан бахархошца шоаш дIахьоча балхах. Белгалде деза, Шолжа кхален Административни комиссе шахьара моттигашка лостам лоаттабара тIехьа боккха болх дIакхухьилга. Урамашка кегар лелабеча бахархошца къамаьл деш, гIишлон балхашцара совъяьнна хIамаш  ханнахьа дIа ца йоахача моттигашка рейдаш дIакхухьаш, къахьег цар тахан. Иштта лоархIаме да наькъашкара хьал лорадар а.

Бутт хьалха дIадоладир вай мехка гIум, жагIа, кагий кхера боаггIача боараме дIа ца къовлаш  машинашца дIа-юха кхухьарашта духьала гIод детташ дола гIулакх.

Наькъаш бIехдеш хилар лаьгIденнад цул тIехьагIа. Иштта теркалде дезарех да, доал доацаш дIахийца лелача хьайбашта духьала болх дIакхахьар. Урамашка, скверашка, иштта кхыйолча моттигашка доладенна лела доахан лаьрххIа къоастаяьча гIод деттача моттиге Iочукхувл. Иштта лела хьайбаш бахьан долаш, хулаш дола хатараш айдаларах дIаболабаь болх ба из.

«ХьалхагIа массахана дег чу кхерам латтар, наькъашка аралелхаш дола доахан бахьан долаш. ТIехьарча хана меттаденад из гIулакх. Доккха баркал кхайкаде лов цу гIулакха хьалхаэттача хьакимашта», - аьлар ГIажарий-Юртарча Забенаькъан ИбрахIима.

Бахархой вахарера кхоачамбоацараш теркалдара тIехьа болх дIакхухь депутаташа. Масала, кIира хьалха Балайнаькъан цIерах болча шахьарерча урамера хин лини хувцийтар цар. 650 метрага кхоачаш йолча моттиге; керда, дикагIа йола турбаш чуяьхкар. Наьха вахара хьал аттачахьа доаккхаш ба из болх.

Администрацешта, цу оагIонцарча моттигий болхлошта чIоагIа лоархIамечарех да 2025-ча шера, 2026, 2027-ча шерашка Шолжа кхален моттигашка къахьегарий алапи лакхдар. Бахархоша чIоагIа сатувс цу оагIонца дика хувцамаш хиларга, хIана аьлча керттера гIулакхаш дIадерзаде а тоъам болаш хилац царна хьатIадоагIар.

Хьакимий цу оагIонца малагIа хувцамаш юкъедоаладе аьттув баьннаб, ца говш ховш хургда.  Кхален депутаташ юкъе болаш, дIайихьача кхетаченга гIолла  керда, дика хувцамаш хургхиларга хьежаш ба Шолжа кхален бахархой.