Спортсмена хӏара коталон тӏехьа латт балха говзал йола хьехамча, дукхача сахьаташка дӀахьош бола къахьегам, цахаддаш ший коталонах тешаш хилар.

Из клуб хьалйир мецената, иштта спонсора, Россе спортивни латара вице-президент хиннача Харсенаькъан Ӏалихана ахчах. Бӏаьш болча спортсменашта хьамсара цӀа хилар цох. Укхаза хӀаране, хьехамча вале а е дешаш-Ӏомалуш вале а, кхетаду ший декхар, бехктокхам, хӀаравар жоп дала дезаш ва спортивни ишкола хургдолчох.

Лакхарча категоре хьехамча, Россе цӏихеза мастер ва Даниелян Григорий. Цо эллиной-румий латара республикан гулъяьча тоабан воккхагӀа вола тренер волаш болх беча юкъа, ше гойтар бехктокхаме болхло санна, цун балха говзал лакха хиларо таро лу нийса гӀа баха. Карарча шера тушола бетта цун керда декхараш тӀадаьхкар. «Ади-Ахьмад СК воккхагӏа вола тренер волаш, Григорий вар шоаш Ӏомабаьча спортсменаша дакъа лоацача дерригача спортивни гӏулакхашта юкъе.

Начӏал дола спортсмен Бӏарахой ИсмаӀал шин шера вӏаштта котваьлар эллиной-румий латарах, 24 шу даьннарашта юкъе дӀахьош хиннача Россе Хьалхале яккхара яхьашка. 2025 шера из котваьлар Турце, дуненна котало яьккхача чемпионаца Юнус Эмре Башараца латаш. Латар дӀадихьар «Магас» спорта ЦӏагӀа халкъашта юкъера NFL 3 турнир дӀахьош. ИсмаӀала дукхаза коталонаш яьхай ерригроссийски халкъашта юкъерча боарама латарашка. Цо дика толам баьккхар 2023 шера 24 шу даьннача спортсменашта юкъе дунен Хьалхалене.

Россерча эллиной-румий латарах вола спорта мастер Къоастой Асланбек цхьаькха спортивни ишкола седкъа ба. Цу латарах дика лоӀам а низ а хиларах (2024 ш.) Россе Хьалхале яккхара яхьашка котало яьккхар цо, иштта дунен Хьалхален котало яьккхар (2024 ш.), дото майдилг яьккхар Европа Хьалхале къайсача.

Из лоархӏавеш ва моллагӏча хьале, ший де дезар довзаш, ший хьехамчашка ладувгӏаш хиларах.

Йовлой Мухьаммада «Ади-Ахьмад» спортивни клубе спортацара болх дика Ӏомабир. Россе спорта мастера боарам дика кхоачашбарал совгӀа, цо кхозза даьккхад «дошув» Европа Хьалхале къайсача (2017-2019 шш.) иштта шозза кхайкавир дуненна Хьалхален Котвалархо волаш (2018 ш., 2019 ш.). 2019 ш. цун спортивни даькъ тӏа лоархӏаме хувцамаш хилар, ондаргий олимпийски ловзарашка цо борза совгӏат даьккхар. Дӏадахача шера из дӏачӏоагӏвелар шоллагӏча моттиге эллиной-румий латара Россе Кубке.

Эллиной-румий латарах Россе Хьалхален кхозза котвалархо ва Опанаькъан Ислам, шийна карагӏдоалар довзара йола котало я из. Тахан цун йоккха говзал я, уж санна йолча яхьашка дакъа лацара. Латархочун начӏал ца зувш дитанзар. Дукхача сахьаташка дӏахьош болча къахьегамо Ислама эллиной-румий латара халкъашта юкъерча класса спорта мастер яха цӏи ера. Цун цӏи исторе дӏаязъяьй, «Ади-Ахьмад» спортивни клуба спортсмен хиларах тарра. Цун керттерча совгӏатех лархӏа дезаш да Европа Хьалхален котало (2016 ш., 2019 ш.); иштта дошо майдилгаш, 23 шу даьннача спортсменашта юкъе (2018, 2019 шш.) дӏахьош хиннача дунен Чемпионате.

«Ади-Ахьмад» спортивни клуб лоархӏаме моттиг дӏалоацаш я вай мехка эллиной-румий латар дегӏадоагӏача даькъ тӏа. Цига ӏомалучар массайолча моттигашка дӏабовзийт хьамсара мохк. Уж кхераш бац шоашца яхьевоалача цхьаккха а спортсменах, хӏана аьлча царна хьалхашка латта декхар да дикагӏчарех, хьалхарчарех хилар.