Къаьстта цу дикача спорта оагӏув лелаеш ва карарча хана, Наьсарера 23 шу даьнна Цӏечой Тимура Адам. Дзюдоист ва Россе халкъашта юкъерча класса мастер, Европа Хьалхален 18 шерга кхоачачар (Варшава шахьаре дӏахьош хиннача) яхьашка котало яьккха, Дунен Хьалхален дото совгӏат даьккха (Ольбия-Шахьар), Европа Кубка чемпион (Малага-Шахьар).

«Сердало» газетаца къамаьл деш, цо дийцар тхона ше профессиональни даькъ тӏа валара истори, иштта дийцар дӏахо де лерхӀачох.

- Адам, маца кхетадир ӏа хье спортивни даькъ тӏа вала безам болаш хилар?

- Цу хана са даьннадар 17 шу. Из ха дикка кхоачам болаш я, воккха хила а деша а. Вай республике таронаш йоккхий цахиларах, иштта новкъосташ даьча хьехарах со республикера дӀавахар. Дукхача моттигашка дӏавехаш вар со, бакъда со сецар Казане. ДукхагӀча даькъе сай таронаш маьхалъяха дагахьа, со нийсвалар сайна ца бовзача наха юкъе, цигара волавелар со балха говзал лакхъе. Аз лаьрхӀар сайна дикагӀа леладе ховр дӏахо дӏадахьа- из дар латар.

- Халонаш нийслорий дешар а спортивни гӀулакх а цхьана тардеш хиларца?

- Халонаш селлара йоккхий яцар. Бакъда цу хана Гӏалгӏай паччахьалкхен университете юридически факультете деша вагӏаш хиларах, со юкъера юкъ лорае езаш вар дешара, спорта.

Даим спортивни яхьашка аха везаш хиларах, дешара мукъавоалаш а вацар, цудухьа сайх тийша дитар лерттӏа дӏадахьа хьожар со.

- Фуд накъадоалар, российски а халкъашта юкъерча а боарам тӏа ший низах бӀуболийтар?

- БӀубенна хилар иштта атта хьакхоачаш дола хьал дац. Спортсменаша тренировкаш дӀахьу дийнахьа шозза, цхьайолча хана кхозза а. Йоккхий турнираш йолча хана, Ӏа дикагӀа кхетаду Ӏайха хьийга къа малагӏа мах болаш да. Из ховш хилча, майдан тӏа майрра аравоал хьо, толам баккха кийча волаш.

- Белгалъе могаргдарий хьона дзюдоиста оамалех керттера кхоъ?

- Дисциплина хилар, лерхӏам, совдар цалеладар. Уж кхо дош шоайла бувзам болаш да, доацаш ца а мегаш.

- Вай кхы дукха бац кагирхой, спортивни клубашка ихачул тӏехьагӏа, лаьрххӀача дешара моттиге отташ бола. Сенца дувзаденна дар хьо Смоленскерча паччахьалкхен олимпийски тароний училище деша оттар?

- ЦӀаккха а дийзадац са, спорта гаьна волаш деша. Со хьожаш ва хӏама гаьнаро зе, цудухьа нагахьа санна са спортивни карьера чакхйоалаш хуле а, го йиш я цунца дувзаденна де йиш йола хӏама. Цу хьакъехьа тренералла болх беш хилар, дикагӏа йола оагӏув я. Нийса деций из, ӏайха хьалаьца никъ дӏахо дӏахьош хилар, профессиональни говзал юкъейоаккхаш, керда чемпионаш хьалкхебеча?!

- Дӏахойодача хана, дзюдо зал хьаелла лаьрхӀа вий хьо?

- Бакъдар аьлча, цун цкъа уйла яь ӏийнавац со. Из де ха хьакхачарга хьежаш а ва. Нагахьа санна вай дувце берий дзюдо ишкол хьаелларах, тӀаккха эшаш хул цу даькъ тӏа гӀирсаш: дика татами, сердало, чукхетийтар, хий кхарза, барзкъа хьалъолла моттиг. Иштта цу чен бустам а дӀалархӀа беза. Спортклуб хьакхоллаш хилча берашта, боккхийчарна лаьрхӀа эшаш я гантелаш, испандераш, еза гиреш (хьамча оасаш), иштта тренажёраш.

Лоацца биографи:

ЦӀечой Тимура Адам ваьв 2002 шера бекарга бетта 15-ча дийнахьа Наьсарен-Шахьаре.

Наьсаре деша ваьгӀар №3 йолча юкъерча ишколе, 8-ча классе кхаччалца.

2017 шера Адам ший дезалца дӀавода мехка столице, из дӀаэц «Магасерча лицее-берий беша»

ЦаӀ йола паччахьалкхен экзамен дӀаенначул тӏехьагӏа, из деша отт Гӏалгӏай паччахьалкхен университете, цул тӀехьагӀа из дешаш хул Смоленскерча паччахьалкхен олимпиада тароний училище.

Карарча хана, цо керттера лоархӀаш бола болх – спорт. Цун говзал, профессионализм хилар бахьан долаш; цунца бартчӀоагӏам бу дика лоархӀаш йолча спортивни клубаша.