Укх тӏехьарча хана, дукха моттигаш я вай кагирхой толхабе гӏерташ, воча гӏулакхашта уж юкъебоахаш, цигара дӏадолалу унзара зуламаш дар, уж нах вахара кхераме хьалаш леладара тӏакхувш хилар. Цхьацца дола зуламаш чӏоагӏа унзара хул, вай дерригаш а оарцагӏдовла дезаш нийслу уж моттигаш.

Дукхагӏча даькъе зуламашта юкъедоахараш моллагӏа долча хӏамах тешаш дола бераш да. Цудухьа из хьал аттача даккхара, цахаддаш ишколашка берашца болх бе беза; царна хьалхадоахаш, тахан латташ йола ха унзара хилар, уж цу юкъегӏоргбоацаш, уж ӏехалургбоацаш.

Наьсарен транспорта прокурора Ганенаькъан Бек-хана терко тӏаяхийтар транспорта моттигашка, бераш юкъедоахаш, деш долча зуламашта. Из хьал дӏахо дӏайодача хана дикагӏа берашта довзаргдолаш, царца хьехама болх бе беза, аьлар цо.

Россе МВД Наьсарен транспорта ЛО даькъ тӏа кхувшбоагӏарашца болх лелабеча инспектора, полице капитана Ӏоахарганаькъан Радимхана, ше къамаьл деш, дешархой терко тӏаэзар наркоманеца дувзаденнача хьала. Цо берашта хьалхадаьккхар, сага могашал эггара хьалхарча мугӏаре латтилга; цул совгӏа, наркотикех хьадоала зулам доккха долга.

Дӏахо цига къамаьл деш яр «Даьхен лорабой» ганза гӏалгӏай филиала вахара хьашташца ювзаенна болхло Элмарзанаькъан Амина, цо дийцар дешархошта экстремизма, терроризма унзарча наькъах. Керте латта дезаш да дика дешар, къахьегама тӏера хилар, нахаца Ӏимерза, Даьхе езаш хилар, аьлар цо, ший къамаьл чакхдоалаш.