ГӏалгӀайчено доаккхал де йиш йолаш саг яр Лейла; из тахан а я хьалхара а, цаӀ мара йоаца а, Эверест лоам тӀа шозза тӏаяьнна къулбехьени къилбаседени Россе кхалсаг. Цо из лоам боаккхаш санна, дукхача наьха дегаш а гӏоздаьхар.

Тахан дагаух Петровская Светланас Албохчанаькъан Лейлайна хетадаь дика мугӀараш:

«Гӏаьнех тешаш вар, вахара чам бовзар -

Йист ца хулача лоамашта юкъе а хургвац цхьаь…

(Кто верит вещим снам, кто знает жизни вкус-

Не будет одинок среди безмолвных скал…)

12-за Эльбруса тӀа яьлар из, шозза Эверест лоамо а сигале хьайийллар цунна.

ГӀалгӀай лоаман кхалсаг Султана Лейла дагадоацача хатарах енна цхьайттлагӏа шу долаш, иштта Сийлахь-боккхача тӀем тӀа Котало яьккха 80 шу дузаш, Краснодарски края «Вайнах» яхача Къаман культуран центро», Сочи-Шахьара къаман юкъарлон Совето вӀашагӀъеллар тӏаьск кхоссарах йола яхь. Хостинска кхален цхьан майдан тӀа спортивни яхьаш вӀашагӀъехкар къаман юкъарлон а Соче юкъарлон а цхьанкхетарий 18 тоабо. Цига керттера дар, шоашта фу карагӀдоал гойтар, доттагӀал чӀоагӀдар, иштта шахьаре дахача 100 къаман цхьоагӀо.

Доакъашхой боккха безам тӀабодаш бар цу яхьашта, иштта децаре селлара чӀоагӀа безаме а хургдацар из ди.

Массане а ка ялац гаьннара тӏаьск меттахьа тоха, цудухьа хӀаравар кийча вар цу даькъ тӀара говзал гойта. Уж ловзача хана, царга хьежача хоалуш дар, цхьабараш лоархӀа ца беш юхагӀертача хана; вожаш шоай кхерам юха а тетта, спортивни декхар кхоачашде гӀерташ хилар.

Хьагучох, каст-каста тренировкаш дӀахьош хиларо толам баккха а таро елар. Укх наькъа гӀалгӀай юкъарлон тоаба котъяьлар. Кхы кӀезигагӀа дакъа лоацаш яцар Сибрен тоаба а, цар шоллагӀа моттиг яьккхар. Яхьаш дӀахьош гӀуозлой юкъарлоно кхоалагӀа моттиг яьккхар.

Дика хет, кагирхой вай Даьхен истори диц ца деш хилар.