Керда боарам
Дошлакъанаькъан Ӏумарá ӏаддалхочун Россе спорта мастер яха цӏи елар
Массехк дийнахьа Рязанерча «Буревестник» яхача спортивни клубе дӏайихьар, мехка 29 моттигера венача, 330 гаргга волча ӏаддалхочоа юкъера яхьаш. 2025 шера лайчилла бетта 27-ча дийнахьа денз оагӏой бетта 1-ча денга кхаччалца, Ерригроссийски яхь дӀайихьар ӏадсаькх кхоссарах. Россе Турпалхочун, Рязань-Шахьара цӏихезача вахархочун М. Г. Малахова сийна еш яр из къовсамий кхетаче.
Цига шоашта фу карагӏдоал гойта таро йолаш хилар 18 шу даланза маӏанах а кхалнах а. Царна хьалхашка латтар декхар, «классически ӏадсаькх», «блока ӏадсаькх», иштта «кхалнаьха классически ӏадсаькх» яха совгӏаташ дахар.
Профессиональни даькъ тӏа, Гӏалгӏай Республикан арбалета ӏаддалхочо, «Дзурдзуки» клуба викала Дошлакъанаькъан ӏумара ший моттиг хьалаьцар. Вай мехкахочун аьттув баьлар ӏаддалхочун даькъ тӏара Россе спорта мастера боарам кхоачашбе. Цу совгӏато чӏоагӏбу цун беррига къахьегам, цо тешал ду лакха говзал ӏомаеш, дӏахо кхы а лакхагӏа толамаш доахаш дӏаваха спортсмена безам хилара.
Цо коталонаш яьхай дукхаза, из ӏемав лакхагӏча лагӏа тӏа латта, даим кӏаьд ца луш къахьегаш ше хьавоагӏаш хиларах толамаш гойта.
«Цо баьккха толам цунга цхьаннега кхоачаш бац, цо из бекъ Гӏалгӏайчен ӏаддалхой ишколаца. Оаха даькъалавувц ӏумар кердача каталонца, дӏахо а иштта профессиональни даькъ тӏа спорта говзал лакхъеш дӏаваха низ кхоачалба хьа!» - аьлар Гӏалгӏай Республикан ӏаддалхой Федераце.
Рязане дӏайихьача яхьашка белгалдаьлар, дика кийчо яь вола, начӏал дола, техникан лакха боарам бола Гӏалгӏайчен спорта керда мастер вай къаман хилар.
