Карарча хана, наькъахоша «Кавказ-Наьсаре-МагӀалбик-Лохера Къаским-Тирк» оала никъ тоабеш латт. Пхи километр бӀаьха ба из. Из болх дӀаболабаьбар дӀадахача шера, иштта укх шерга йоалаш яр из тоабаь баккхара йилла хинна ха. Цу юкъа цхьа километр болча наькъ тӀа йистебаьннаб керттера болх, кӀалха буллаш бола боккхача жагӀа оаса а тӀераасфальта никъ а болаш.

«Юхедисача наькъа даькъ тӀа тӀера асфальт лаьрххӀача машинаца хьалхьебеш дола балхаш дӀадоладаьд, тӀехнахьа керда асфальт ӀотӀабилла кийчо еш я. Проекта чудоагӀача беса, шолха асфальт билла лаьрхӀад никъ Ӏобуллаш: кӀалха боккха жагӀа, лакхе кагий жагӀа бохийташ. Наькъа йистошка гӀолла чӀоагӀа кӀийле ергья, наькъа такаш дехкаргда, юстарвала моттиг а ютаргья. Из доацаш а, хин турба хувцаргья.

Иштта цига сердал а е лаьрхӀад, цул совгӀа гӀашлой наькъаш дахка, транспортага хьежача наха совца кхоаленаш е лаьрхӀад. Наькъа кхерамзленна Ӏалашо яра, хьехам луш йола моттигаш, хоам беш дола бӀоагӀилгаш хургда, массанахьа басарца такаш а дергда», - аьлар наькъахой боахаме. Уж деррига балхаш, карарча шера йистедаьнна хила деза. Бакъда из декхар тӀаийцача тха болхлоша массаза санна лаьрхӀача ханал хьалха из болх йистебаккха тарлуш ба. ГӀадвугар да, сиха беча балха нийса, хьабеча балха дикал а хилар.

Из моттиг йоацаш, ГӀалгӀайчен наькъахоша карарча шера кхы а 15 никъ тоабергба. Уж балхах кхераш бац, хьабе болх хилча, хьинаре къахьегарех ба.

«Вай деррига наькъаш нийса а хоза а хургда, дото оасаш санна, иштта наькъа кхерамзле йолаш а хургда, новкъа леларашта аттагӀа хургдолча беса», - яхаш, белакъежар моажа къоанзолгаш ювхаеш бола къахьегамхой.