Лаьттанна тӀакхувдарашцара къовсам
Бокъо йоацаш лаьтташ хьалувцарашца лоаттабу къовсам чӀоагӀлуш боагӀа
ГӏалгӀай мехка чӀоагӀлуш боагӀа шоашкара, Ӏаьдала бокъо йоацаш, лаьтташ хьалувцаш болча нахаца дӀахьош бола болх. Къаьстта кӀезига лаьтташ долча республике лоархӀаме кхоачамбоацар да из. ГӏалгӀайчен кулгалхочо Келаматанаькъан Махьмуд-Ӏаьлас аьлар, доал деча даькъ тӀарча болхлошца цхьана, цу наха духьале лоаттаю болх вӀашагӀболлаш ба. Цу тайпара хоам «Сердало» газетага бир ГӏалгӀай Республикан Кулгалхочун зарбан болх лелабераша.
Карарча хана, Шолжа кхале болх дӀабихьаб еррига лоархӀамеча гӀишлой моттигаш, иштта доал деча даькъ тӀара 190 лаьттан дакъа кадастра оагӀорахьара дӀаяздеш. Хьалхарча ах шера, кхален доазон тӀа гучадаьхар, бокъо а йоацаш шоашкара хьалаьца 1,65 гектар лаьтташ. Цу моттига духьала административни гӀулакхаш хьадийллад, бехкебараш бехктокхаме озаргба.
Из болх дӀабахьарах, юкъара моттиг 2,2 гектар йола диъ лаьтта Оалкамара, Мужечара хьахийцар наха шоаш раьза а болаш. Хӏанз ДаьттагӀа 0,6 гектар наха дӀалаьца лаьтта мукъадоаккхаш, суд еш я.
Иштта теркам тӀабахийтар, бокъонах доацаш дӀалаьцача Ӏаьдала лаьттанна доагӀа каьхаташ цу наха луш хилара. Гӏажарий-Юрта цу тайпара 12 моттиг нийсъелар, из гӀулакх тахкара дола каьхаташ дӀадахьийтад Шолжерча прокуратуре.
«Даьхача толамаша хьагойт, лаьттанцара гӀулакхаш нийсача дахара дош теркама юкъе хилар. Оаха законах леладергда, лаьтта хьатӀаяздеш болх дӀабахьара дола гӀулакхаш, иштта бокъонах доагӀаш деце, шоай лоӀамагӀа лаьтташ хьалувцаш дола хьал юхатохаргда», - аьлар ГӏалгӀайчен Кулгалхочо.
Со тешаш ва, аьлар цо, Ӏаьдала болхлоша, юкъарлоно цхьана къахьегаш хилча, лаьтташ дӀалувцаш дола хьал тоалургхиларах.
