Керда наькъаш
Кагирхой политика дикка дегӀайоагӀаш латт вай мехка
Республикерча Паччахьалкхено 2024-ча шера дӀабихьача балхах дувцаш, республикера кагирхой политика дикка яржаш латтилга белгалдир Паччахьалкхенна хьалха латтача Сластенин Владимира. «ЛоархӀаме гӀа баккхар да, кагирхошта лаьрхӀа тайп-тайпара моттигаш хьаеллар. ГӀо деш дола гӀулакх хьаллацарах йолча «Дикача гӀулакхий мохк» яхача яхьашка, «Вахаре хьинаре хилар» яхача федеральни проектага гӀолла 100 кв.м кхоачаш йола гӀо деш леларий моттиг хьайийллай мехка. Цу чу я 100 сага моттигаш луш йола актови зал, 40 сага лаьрхӀа кхетачен зал, видеогойтамаш, иштта кхыдола вӀашагӀкхетараш дӀакхахьа йиш йола экранаш. Видеостуди, кагирхошта лаьрхӀа болх бу моттиг я цу чу», - белгалдир премьер-министра ший къамаьла юкъе.
ЛоархӀамеча гӀулакхех да Магасе хьайийлла 3000 кв.метрага кхоачаш йола кагирхой моттиг. 2024-ча шера вӀашагӀбеллар цу оагӀонцара проектно-маьха болх. Цул совгӀа, кагирхой оагӀонцарча юкъарлон болхлоша дакъа лоацаш, юкъарча кхетачен, архитектуран колледжа эскиз кийчйир мехка, цу моттига лаьрхӀа доазув а къоастадаьд.
Хьалкхувш латтача тӀехьено дика хувцамаш дарга сатувсаш ба мехка. ГӀалгӀай Паччахьалкхен университет хиннача коа хьаелла лерхӀ кагирхошта лаьрхӀа 2000 кв.м кхоачаш йола моттиг. 2026-ча шера, «Кагирхой мохк» яхача программага гӀолла 250 млн сомага кхоачаш субсиди хьаэцаргдолаш, дехар чуденнад. Из проект хьаллоаце, регионе шоллагӀа Кагирхой цӀа хургда. Геттара гӀадвугаш ба гӀо деча оагӀонцара болх, дӀадахача шера гӀо деш леларий никъ хьаийцараш пхи эзар совгӀа кагирхой бар.
Массахана терко е езарех ба, Республикерча Паччахьалкхено тӀема операце доакъашхошта гӀо деш дӀахьош бола болх. Митингаш, хоамий каьхаташ декъаш дола боламаш дӀакхухь мехка, каст-кастта кхетачеш хул дешархошца, студенташца. «Къона патриот» яхача, кагирхошта тӀема, Даьхе езара гӀулакхаш довзийташ йолча моттигага гӀолла бувзам лоаттабу къонача тӀехьенца. Тайп-тайпара тӀема оагӀонех йола спорта яхьаш дӀакхухьаш къахьег мехка, 1000 совгӀа дешархочо дакъа лаьцад царна юкъе.
Эскаре амал дара гӀулакх довзийташ, «Маьрша хийла хьо, иккашцара къонал» яха кхетаченаш дӀакхихьай кагирхошца, Эбарга-Юртарча тӀема даькъага гӀолла тӀема гӀулакх довзийташ экскурсеш ю. Пхе ишколера 300 совгӀа бер да цу юкъе дакъа лаьцараш. ЛоархӀаме моттиг дӀалоац, премьер-министра белгалдечох, тахан даржаш латтача кердадараша.
Тахан вай халхара ансамблаш я, кагирхой телевидени хьаеллара наькъ тӀа хьалхара гӀа баьккхаб, къаман культура, Ӏадаташ дезадолийташ йола проекташ йоаржаяьй. Къаман мотт лорабара тӀехьа «Дош», «Вай мотт» яха проекташ хьакхоллаш къахьийгад къонабараша; яхьашка дакъа лоацаш, 18 млн совгӀа рузкъах латта гранташ кхаьчай республикерча кагирхошта.
