«Хьабе лаьрхӀа болх йистебаккхар-керттера декхар да укх деной. Къаьстта терко лоаттае еза бахархошта дика хьалаш хилийтара, цу юкъе - хий, газ, ток. Аз тӀахьех цу гӀулакха бехктокхамебараш, бахача наха лоаттадеш дола хьалаш хила деззача тайпара дикал йолаш, шоай ханнахьа дий хара; вай декхар да шелал хьаэттачул тӀехьагӀа тешшаме йӀовхал наьха цӀеношка лоаттаяр. Иштта теркалде дезарех да ший ханнахьа, дикал лакха йолаш уж хилийтар. Аз вай бахархой тӀахьех ЖКХ даькъ тӀа шоашта нийсденнача кхоачамбоацарех бувзама оагӀонашка гӀолла хоам бара. Цо таро хулийтаргья, бахархошта лоаттадеш дола вахара хьалашца дувзаденна гӀулакх тоаде.

Со тешаш ва, йоагӀаш йола кийчо яь вай хуле, хьатӀайоагӀаш йола гуйран-Ӏан зама вай дика дӀахьоргья, мехка вахара Ӏалашон дерригача даькъ тӀа цахаддаш болх дӀа а хьош», - аьлар ГӏалгӀайчен Кулгалхочо Келаматанаькъан Махьмуд-Ӏаьлас.

Республико доал деча даькъ тӀа централизованни ялх котельни я, цар Ӏалашду йӀовхалца ваштӀара даь 54 цӀа, иштта ворхӀ вахарца ювзаенна кхыйола моттигаш. Юхейиса вахара лоархӀаме моттигаш, ваштӀара даь цӀенош къаьстта йӀовхал лоаттаергйолаш Ӏалашо яь да.

Хӏанз дӀахьош да лоа дӀадоахаш йола техника эшача гӀирсаца кийъеш дола балхаш, Ӏалашбеш латт тух-гӀум вӀашагӀъэдаь кхоачам, из эшаш ба наькъаш гӀорадеш шелал эттача, керттера йӀовхал лоаттаеш дола яьш болх беш дий хьожаш, Ӏан замах хина кхоачам хургбий хьожаш дола балхаш дӀахьош да.

Мел эшача тароний Ӏалашо лоаттаеча организацеша цахаддаш газ, ток, хий хилийтара кийчон балхаш дӀахьу. Тока саьргаш долча юхе гӀолла гаьнаш дӀахедаеш дола балхаш деш да.

Из деррига деш да наьха вахар Ӏан замах аттача даккхара, царна коммунальни хьалаш цахаддаш лоаттадара. Нагахьа санна газаца дагадоаца хьовзам нийслой, йӀовхал лоаттаеча организацеша коача газ хилийтара хьалххе а дийцад, вӀаший гӀулакх леладеча моттигашца.

Вахара-коммунальни боахама объекташка авари хинна, е кхыдола хьал этта хуле, аьнна, юкъейоалаяьй ЦаӀ йола система. Из бахьан долаш, таро хул автоматически дӀаязде нийсденнар,цудухьа из ший ханнахьа юстардаккха таро хул; тоае езаш е хувца езаш оатхал нийслойя, из дӀахувц.

Доал дара даькъ тӀа массанахьа хӀанз дӀахьош да йӀовхал лоаттаярга кийчлу балхаш. Масала, МагӀалбике хьожаш ба №1 йолча котёлага, иштта йӀовхал луча гидравлически оалача моттигашка а хьожаргба.

Илдарха-Гӏалий тӀа а котёлашка хьожаргба, насосаш,вентилеш,загалаш тоадаь хулийтаргда.Иштта вӀаштӀара даьча цӀеной чура балхаш миштад хьожаргба. Цу юкъегӀолла, Магасера говзанчаш трансформаторни подстанци мишта болх беш я хьожаш ба, хувца езар дӀахувцаш.

Шелал хьатӀайоагӀаш хиларца, Наьсарен кхале а котельнешцара болх дӀахьош ба, ваштӀара даьча цӀеношка теплообменник оала оатхал хувцаш я.

Лоаман Жӏайрахьа лоа дӀадоахаш йола техника, кхыйола оборудовани кийчъеш латт, хӀаьта РЭСа болхлой трансформаторашка, тока саьргашка хьожаш ба.