«Цу кхетачен хьалхаэттараш ба, мехкарча къаман кхоллама Цӏен болхлой. Тахан керттерча декхарех да вай ураотташ латтача къонача тӏехьен терроризм яхача зулама юстара хила езилга, Дала харцахьа лаьрхӏача хӏаман никъ хоадабе безилга хьалхадаккхар»,- дийцар «Сердалога» РДНТ исбахьален оагӏонцарча балха кулгал деча Абдурзаканаькъан Аьсета.

Во хӏама доаржадераш вахара оагӏонаш дикка йовзанза бола къонабараш чуоза гӏерташ хул шоай бӏехача гӏулакха юкъе. Интернета оагӏонашка гӏолла из зулам доаржаде гӏертарашца цхьаккха тайпара бувзам лелабе, цар яхар хьаэца, теркалде йиш йоацилга даиман дӏадувца деза кагирхошка. Вайга массанега кхоачаш бола боккха болх ба из! Семинар дӏахьочар шоашта хьалхашка оттадаь керттера декхар да, ма хулла цу оагӏонцара болх боаржабеш, вай къона тӏехье лораяр.

Терроризма духьалара политик хьаллоацаш я тахан «Тхо терроризма духьала да» яха семинар. Кхетачен доакъашхоша ма могга шерагӏа доаржадергда цу оагӏонца дувзаденнараш. Белгалде деза, иштта йола кхетаченаш дешара моттигашка дӏакхахьар тахан лоархӏамеча гӏулакхех долга. Къонабарашка дӏадувцаш латт, моллагӏа тешаме ца хета хӏама зийча, ма хулла сихагӏа ӏаьдала болхлошка хоам бе безилга. Терроризм адамашта юкъе йоаржае гӏертараш, тайп-тайпара дукха оагӏонаш юкъелоацаш дӏабахьа гӏерташ хул шоай бӏеха болх. Цу доккхача зуламах хьокхавенна саг ший ираз доадаьрех волга белгалде деза къонабарашцарча къамаьла юкъе.

Хьехархоша, кхоллама оагӏонцарча болхлоша, иштта кхыбараша хьаллоацаш, боаржабеш болх ба из тахан вай мехка. Къонабарий кхетама хьал нийсдар, зене- зуламе долча хӏамах уж лорабар вайна хьалхашкара доккха декхар да. Семинаре дакъа лоацаш хургба къаман артисташ бола Дзейтанаькъан Тимур, Зангенаькъан Руслан. Цу оагӏонцарча балха юкъе дакъа лоацаш хиларца бовзаш ба уж тахан. Культуран оагӏонцарча къахьегамхоша тахан из гӏулакх доаржадеш хилар геттара лоархӏаме да. Иштта семинара юкъе ба «Театрон» яхача театральни студера къона актёраш , ӏаьлий-Юртарча гимназера дешархой.

Цӏагӏара хьаболабенна, дешара, иштта кхыйолча кагирхой гуллуш мел йолча моттигашка лоаттабе беза вай из болх. Бӏехача хӏамах хьокхавала, ший деррига вахар толхадаь дӏаваха дукха ха эшац, цудухьа цӏагӏарча дас- нанас тӏахьожам лоаттабе беза шоай дезалхо мичахьа, хьанца, малагӏа гӏулакхаш кхоачашдеш лел хьожаш. Нийсача наькъ тӏа хила ловш волчоа тахан дукха дикаш да хьаэца, из хьалхадоахаш ураоттабе беза дезал. Массанега кхоачаш боккха болх ба из. Таханарча вай тӏехьенга хьежжа хургда кхоанарча вахара денош а, из дагалоаттаде деза массахана! Хӏаьта вай мехка кхоане сийрда, беркате хилийта гӏерташ тахан дӏахьош бар мах баь варгвоацаш боккха болх ба! Къона тӏехье из кхетадайташ ураоттае еза. Вай массане юкъара гӏулакх да из, вай дерригаш цхьана хилча; аттагӏа хургда из болх дӏабахьа.