Вӏашагӏкхетара керттера бахьан дар профессиональни говзал йовзар, дешара шера дика хьинар долаш накъабахар. Программа чубоагӏаш бар проектни болх, интерактивни говзанча хьехамаш, дика проекташ къоастаяр.

Практически оагӏонна чуйоагӏаш «Хьалхарчар дош» яха интерактивни оагӏув йоаржайир, цига къамаьл деш вар ӏарчакханаькъан Саӏид. Из ва болама мехкагӏончий кхетам балара оагӏон кертте латташ, иштта ловзара технологей эксперт.

Цо кулгал а деш, доакъашхоша тоабашца цхьана хаттараш къоастадир, цар техкар хьехархочун хьалхашка отташ дола чоалхане хьалаш, иштта цар ӏомадир хьалхарчар доакъош дӏаходахьара хьалаш. Цига хӏаране таро яр шийна кулгалхочун болх дӏабахьа могаргдий ха.

Къаьстта йола оагӏув яр тоабан юкъера психологически хьал тоадара хетаяь, из дӏахьош вар Нохчий паччахьалкхен хьехархой института хьехархо, пхьоаллен кулгалхо, хьехархой ӏилмай кандидат, «Россе шера Хьехархо - 2018» яхача яхье котваьнна Динаев ӏалихан.

Дика вовзаш волча хьехархочо ший болх бовзийтар, цо гойтар сиха оамал йола саг кӏаьдагӏа ве, берашца царна сагота хургйоаца тешам луш йола балха оагӏонаш лахар мишта хила деза. Ишколашка нийслуш дола масалаш доаладеш, цо довзийтар балха гӏирсаш, уж хьехамчаша шоай классашка, тоабашка леладе йиш хилар.

Вай заман технологически кердадараш юкъедоахаш хилара хетаяь яр «Сага кхелла хьаькъал хьехамчанна новкъостала»: керда таронаш» яха оагӏув.

Таьрахьашца дегӏаахара Академе эксперт йолча Тӏонганаькъан Аьсета гойтар, дешара даькъ тӏа нейросеть яккхаро новкъостал деш хилар - керда йоазош дара, дешар дӏахьош кийчо яра из эшаш я, аьлар цо. Ладувгӏаш хиннараш из хьал дика къоастаде ховш бар, пайда луш йола таьрахьий оагӏонаш хӏанззе а лелаеш бар.

Мехка вӏашагӏкхетар чакхдаьлар, бакъда эггара безамегӏа, терко тӏаозаш дар хӏанз дӏадолалуш мара дац. Хьехамчаш, из болх лелабераш, кхетам балара даькъ тӏа гӏо дераш шоай хьамсарча шахьарашка, юрташка, дешара моттигашка цӏабахар, цар шоашца дихьар, лакха балха говзал йолча эксперташкара дукха шоай балха тӏа накъадаргдар. Уж тешаш ба шоай хьинарах.

Хӏанз из йоккха балхаца ювзаенна говзал, искусственни интеллекта даькъ тӏа ца деш дисар царна дика довзаш хургда. Тоабашца бувзам лелабара психологи вахара, дешара моттигашка дика юкъейоаккхаргья.

Цига хьаийца балха эшараш, кердадараш, хьалхале лелаю гӏирсаш ерригача Гӏалгӏайчен студенташта, дешархошта накъадоалаш хургда. Цо таро лургья берашта шоай чура таронаш хьаелла, вахарца бувзам бола проекташ майрра оттае, «Хьалхарчар болама» тоабанна толам баккхара тешшаме хьалхара, эггара лоархӏамегӏа бола гӏа баккха.