-ХӀанз-м лерттӀа никъ ба цига. Из унзара хатар нийсденначул тӀехьагӀа, ши-кхо шу даьлча Ӏобиллар из никъ. Цу хана цхьа метр мара шера а боацаш, цхьацца йолча моттигашка кхы а готтагӀа болаш, никъ бар из. Цу наькъ тӀара ваьннар бӀарг ма кхоачча кӀоаргача ахка чугӀоргвар. КӀаьдбенна боагӀа нах чӀоагӀа кхерар цу наькъах. Цига гӀолла баьхкаб дукха километраш никъ дӀалоацаш хинна беха нах, царга хий а даар а дацар, е тӀабувхаш бӀайха гӀирс а бацар. Цу хана денош чӀоагӀа шийла латтар. Бийсан, гӀораеш, шийла яр ара. Ше хьавоалуш воацар, наха новкъостал а деш, воалавора. Унзара сурт дар. Цул халагӀа ха, 1944 шера саькура бетта хиннар мара яц, - яхаш, дагаух из бӀаргадайнача Оалкамарча наха.

Царех цхьанне, Йовлой Мухарбика дувц:

- Оаха тӀаийца хиннача цхьан дезале бар нана, йоӀ, найц. Найца мархӀа а елла йоалаеш яр уст-нана, из ше хьая могаш цахиларах.

Цу юрташка баьхача наха массане а цхьана тӀаийцар, цу хана гӀалгӀашта тӀабена хинна из бала. Наха кходацар е хьинар е рузкъа. Хьалхара новкъостал дора, цул тӀехьагӀа кӀеззига меттабаьхкача, шаьрача моттиге ӀокӀалбоалар беха нах, цига шоай гаргарча наха дӀабугар уж.

Бакъда, из дика гӀулакх вайна Дала деннад: хало тӀаеча вай цаӀаш хул. Цунца ба вай низ а.