Кердача шера тамаш
Гӏалгӏай мехка болх беш я Гӏордаде почта
Керда шу хьатӏадоагӏаш, эггара дукхагӏа дезача хӏаманга сатувсилга хул берий санна боккхагӏчар а. Е ханага, е вахара хьалашка, е кхыча таронга хьежжа доацаш, вай теша ловш хул дикача хӏамах, безамах, иразах, иштта дерригача дунен тӏа машар оттарах. Хӏара саг, воккха вар аьнна доацаш, беро санна диканга сатувсаш хул, из ха тӏайоагӏача хана.
Лоархӏаме да хала воаллача сага новкъостал дар, наггахьа мара таро хилац вай иштта волча сага дегагӏоз е. Из санна йола моттиг хьаллаца безам барашта лаьрххӏа Магасерча, Кулиева урамах почтан отделене яьшка ӏооттаяьй, Гӏордадега дохьийташ дола каьхат ӏочукхосса йиш йолаш.
Россе почто «Дӏадахьийта каьхат Гӏордадега» яха кердача шера болам дӏахьоргба, 2025 шера оагӏой бетта 31-ча денга кхаччалца. Из хала болх а бац, цига йоаеш яр цхьа минот ха мара а яц. Из каьхат кердача шера тамашийна гӏалакхаш карагӏдоалаш волча сагага дӏакхачийтара эшар да, ший адрес нийса цу тӏа ӏояздар. Цу тайпара шоана дагалатташ дар дӏакхоачаргда, Вологодски областа Великий Устюг оалача шахьаре, «Гӏордаде цӏагӏа».
Нагахьа санна каьхата тӏа адрес а, из дӏадохьийтача сага цӏи а яле, жоп лургда ӏан бӏарловцара. Хӏара шера из болам дӏахьош хиларо боккхийбараш а юкъебоах, дика гӏулакхаш леладара, бераш а шоашта дезар хьаала ӏомалу, диканга сатувсаш хул уж.
Дукха бераш сатувсаш хул кердача шера шоашта дагалаттар кхоачашхиларга, цар язду тайп-тайпара каьхаташ, цу чу шоашкара цхьацца дола сурташ чудохка хьож. Цар сатувс бӏарччача шера шоаш хьежача диканга.
