Гулбеннараша белгалдир, фусамех бехача наьха массе оагӀорахьара бокъонаш меттаоттае езаш хилар, иштта уж шоаш баьхача Пригородни кхален доазон тӀа цӀабахийта безаш хилар.

Цу хана хинна хатар дагаухаш, митинга доакъашхоша белгалдир, вай мехка бахача массе къаман нахаца барт болаш хила дезилга, лоалахошцара машар лелабе безилга.

Цу лостамагӀа мехка Ӏаьдало боагӀаш бола болх дӀахьу. Иштта дийцар, таханарча хана латташ йолча политиках, уж хаттараш чоалханеча хана кхоачашдарах, къамашта юкъера хатараш теркама юкъе хила дезилгах.

Укхаза гулбеннараша йийцар, шоай дегаш тӀа йиса човнаш, 1992 шера хатар хилча, хӀара дезала из Ӏеткъа хилар, гаргарча нахах къаьста дукха нах бисар.

Ткъаь итт шера совгӀа, халонаш озаш баьхаб цигара беха гӀалгӀай, цӀаккха а ерзаргйоаца чов хиннай цар дегашта.

Наха белгалдора, шоаш кхайкарал деш, къам цу халонашта духьалъоттар, тахан республика хургдола сийрда вахар хьакхоллаш хилар.

Кхоанен керттера декхар – нах шоаш баьхача фусамашка, шоай мехка цӀабахийтара эшаш дола хьалаш хьакхоллар; массаза а дешаца, гӀулакхаца, къамашта, бе-беча дин викалашта юкъера машар лорабар.

Пригородни кхале байнарех бола дагалоаттам лорабеш; ГӀалгӀайче чӀоагӀа я ший хьаькъалца, цӀенача къахьегамца, ший бахархошца цхьана; дика гӀулакхаш леладарца, ший мохк дика дегӀабоалабарца.

Дагалоаттама болам йистебоалаш, 1992 шера гурахьа байнарашта, иштта таханалцца мичаб ца ховш, де доацаш байнарашта тӀера дуӀаш деш, ламазаш дир. Цар дезалашта, гаргарча наха, республикан кулгалхочо Келаматанаькъан Махьмуд-Ӏаьлас тӀадиллача декхарах, ахчанца уж хьаллаьцар, новкъостал дир.