Вай деношка из ца хилча даргдоацар да, тӏем тӏара цӏабаьхкача бӏухошта. Берригача бӏухошта эшаш да сиха маттаоттар, чов йийрзачул тӏехьагӏа ше хьалха леладаь вахарера гӏулакх дӏадахьар.

Ше къамаьл деш Российски Федераце оборона Министра гӏончас, «Даьхен лорабой» ганза кулгалхочо Цивилева Аннас ма аллара, спортага гӏолла тешам чуболл ветеранашта, шоаех бӏу бенна хул, иштта шоашта уллув латта кхыбараш хьаллаца кийча хул.

Лаьрххӏача операце Украине дӏахьош йола спорт – из духхьал физически хьал леладар хинна ӏац, из меттаоттара йоккха таро я, цо юхавугаргва хьалхарча вахарга. «Даьхен лорабой» ганза дукха къахьег ветеранаш спорта юкъебахара. 6000 совгӏа СВО ветеран спортаца дувзаденна вахара хьал леладеш ва.

«Моттигашта юкъерча, иштта кхыйолча яхьашка, «Даьхен бӏухой Кубок» яха доал деча даькъ тӏарча яхьашка дакъа лоацаш хиларо царна новкъостал ду могашал тоаяра бола спортивни никъ дӏахо дӏабахьа. Цу яхьашка вӏашагӏкхет берригача мехкара турпалхой, цар таро лу царна меттаотта, физически могашал тоае, керда вахара никъ харжа, новкъосташца дагабала, шоашта фу мог дӏагойта, мел йоккха чов хиннаяле а, вахар дӏахо дӏадодаш хилар гойта…»,- аьлар Цивилева Аннас.

Гӏалгӏайчен моттигера филиал лаьрхӏа я истола тӏара теннис дегӏайоалае, из эшаш я бӏаргашта хӏама гуш боацарашта, пауэрлифтинга, ӏохайна вагӏача волейбола, следж-хоккея (соалозашкара хоккей), ӏад кхоссар, кулгаш гӏортадар, иштта кхыйола а яхьаш лелае.

Паччахьалкхен вахарцарча оагӏон болх лелабераша яхачох, тахан спорт эггара чӏоагӏагӏа ветеранашта эшар я. Цар каст-каста тоабаш вӏашагӏйоахк моттигера, ерригроссийски яхьаш дӏаяхьар духьа, цига бӏухоша коталон моттигаш йоах.

Эггара сийрдагӏа йола яхь я «Даьхен бӏухой Кубок» яхар. Из дӏахьош я 2023 шера денз, РФ «Даьхен бӏухой» ганзо, Россе Паралимпийски комитетаца цхьана, РФ спорта Министерствос, моттигерча правительствос хьаллоацаш. Низа, денала, лоӏама цӏай дӏахьош; бӏухоша лакхагӏча лагӏа тӏа оттара йола шоай бокъо йоаккх.

«Спорта хьал леладаро ший низах тешаву моллагӏа. Вай доаккхал ду воай турпалхоех, цар чов яьчул тӏехьагӏа шоай масалца хьагойт, кагирхошта вахар мишта хила деза: сийрда, котало йолаш!»,- аьлар Гӏалгӏай Республике гӏолла йолча «Даьхен лорабой» ганза филиала кулгалхочо Оздой Муслима.

Моттигерча ӏаьдало, фонда новкъостал а деш, СВО ветеранаш хьож шоай вахар дӏахо дӏадахьара йола таронаш, вахара никъ лаха. Меттаоттара спорт диззача вахарга вуга никъ ба, цига вӏалла дага йоаца дика таронаш я.