«Цу бӏехача зулама юкъе кагирхой чуозараш итт шу хьалхагӏа хинначул говзагӏа кхесташ ба. Юххьанца хьоца доттагӏал тасса безам бола нах санна хьовз уж, дӏахо хьа оагӏув хьаллаца, моллагӏча моттиге уллув хила кийча бола нах санна хул. Лекцешка гӏолла кагирхошта хьалхадоах оаха; малашб ца ховш болча, цхьа боккъал башха нах шоаех хетийташ барашца бувзаме ма дувла; тешаме доаца хӏама теркалдича, ӏалаьмате чехка хоам бе ӏаьдалга, яхаш.

Дика да, массахана цо шийна хетар боккхийчарга дувцаш хилар, хӏаьта кхы а дикагӏа да уж тайпара хӏамаш къестаде ховш хилар. Оаха кхетам лу царна, дуккхадараш довзийт», - дийцар «Сердалога» дешареи ӏилмани гӏулакхех йолча министерствон къаман дешарах болча оагӏон хьалха латтача Вешкаранаькъан Хизара. Ер бутт йистебалале, 20 совгӏа кхетаче йоаржае лаьрхӏа ба уж. 700 совгӏа дешархо ва цу оагӏонцара кхетам чӏоагӏбергбар. Яндаре, Эккажкъонгий-Юрта, Сурхо тӏа, ӏаьлий-Юрта цу мугӏарера кхетаченаш дӏакхихьай.

«Кхетам» яхача Российски оагӏон лектораш, дешара моттигий кулгалхой гӏончаш ба болх дӏахьораш. Боккхийчарна а, кхувш латтарашта а лоархӏаме йолаш кхетаченаш я уж. Цига белгалду, ший дезалца массахана бувзаме хилар, шийна хетачох царца дагавалар чӏоагӏа лоархӏаме долга. Хӏара хаттар доашхаш, нийсача наькъ тӏара цавалар мичахьара хьадоагӏаш да дувц цига.

Белгалде деза, иштта йола кхетаченаш тахан чӏоагӏа эшаш йолга. Дешархой шоай хьаькъалца лийна ца ӏеш, моллагӏча хӏаман тӏехьа хьехархошца, цӏагӏарча нахаца дагабоалаш хила беза. Да, нана шоай дезала лакха тӏахьожам лоаттабеш, даиман царца къамаьл доагӏаш, уж шоай лоӏаме ца буташ, фийла хила беза. Ер бутт чакхбаллалца кхы а массехк юрта хургья уж лекцеш.

Тахан беррига кагирхой интернета оагӏонашка ба, дукха да царна го, довза йиш яраш. Бовзаш боацача нахаца бувзаме цабувлар, бӏехача гӏулакха тӏахьехачар дувцар теркалцадар хьалхадаха деза царна цӏагӏа а дешара моттигашка а. Терроризм яха доккха зулам вай массане духьале лоаттае езарех да. Зуламхоша тайп-тайпара лелабу шоай бӏеха болх; къонабараш тувлбе, шоаш дувцачах тешабе гӏерташ. Уж мо болча наха духьале е ховш хила беза вай кагирхой, моллагӏа тешаме доаца хӏама ӏаьдалга дӏадувца деза.

«Кхетам» яхача оагӏон лектораша шоай болх цу оагӏонцара шедар чулоацаш дӏакхухь. Дешархой, иштта цар даьй хила беза; низ тӏакхахьара духьале еш, терроризм яха во доаржаде гӏертараш бовза ховш. Тахан латтача хана, чӏоагӏа лоархӏаме да цу оагӏонцара кхетам чӏоагӏбар.