Боккхагӏбарашта терко яр тахан лоархӏаме да
Ветераний Цӏа дотташ бола болх тӏатеӏӏа дӏахьош ба
Наьсарен кхален Сурхо тӏа ветераний Цӏен кхоалагӏа корпус хьалъеш, дӏахьош латтача балхага хьажа ваха хилар вай мехкада Келаматанаькъан Махьмуд-ӏаьла. Цу моттига хьал техка, цига дарба деш болча къоаношца къамаьл дир республикан кулгалхочо. Из хоам «Сердалога» бир Мехкадаь, Паччахьалкхен зарбан болх лелабераша.
«Дезал» яхача къаман проекта «Боккхагӏбараш» яхача федеральни программага гӏолла дӏахьош бола из болх укх шерарча маьтсела бетта дӏаболабир. Йоккха йоацача юкъа цу доазон тӏа де карагӏдаьннараш дукха да. Хьалхарча гӏата аьшкабетона чӏоагӏо дӏаоттаяь, шоллагӏча гӏата болх дӏахьош боахк цига. Вай мехкадас Келаматанаькъан Махьмуд-ӏаьлас тӏадиллад болх боаггӏача боараме, йиллача хана чакхбаккха аьнна.
«Ши шу хьалха лаьрхӏар аз къаьнара гӏишло дикка тоаяь, цу моттиге хувцамаш де деза, аьнна. Вай ветеранаша салоӏаш, дегӏа могашал меттаоттаеш йола фусам тӏехдика тоаяь латташ хила еза. Тахан вайна гуш да-кх, «Дезал» яхача къаман проектага гӏолла укхаза 50 сага моттигаш луш йола дика гӏишло хьалъеш латтилга», - белгалдир Мехкадас. Ала деза, «Демографи» яхача къаман проекта «Боккхагӏбараш» яхача моттигерча проектага гӏолла, 2019-ча шергара 2024-ча шерга кхаччалца, ха яхача наха, заӏапхошта терко яра гӏулакх дикка тоаденнилга. Цу оагӏонга гӏолла, дӏадахача шера 217 сага гӏо деш болх дӏабихьар.
«Къоаношта, дегӏа могашал эшаеннарашта, паргӏатта ха дӏаяхьа, дарба де, иштта коа гӏолла хӏара дийнахьа гобоаккхаш лела аьттув хургболаш, боаггӏача боараме тоадеш латт цигара хьал. 2026-ча шера аьтинга бетта хьаелла лерхӏ керда корпусаш. Чӏоагӏа дега тоам хулаш да, тахан цу чу ха йоаккхаш болча къоаноша, геттара раьза болаш, къамаьл дар. Боккхача наха дийцачох, царна мел эшар лоаттадеш, хоза кулг тохаш, терко еш моттиг я из», - белгалдир вай Мехкадас.
Ма дарра аьлча, 2010-ча шера денз, ветераний Цӏагӏа дегӏа могашал меттаоттаеш хиннараш 7 эзар совгӏа саг ва, царна юкъе ба СВО 7 бӏухо. Цул совгӏа, укх шера СВО доакъашхой дезалашта юкъера 30 саг хилар цига ха йоаккхаш. Хӏара шера ветераний Цӏагӏа могашал меттаоттаеш, салоӏаш 565 совгӏа саг хул. Керда корпусаш хьайийллача, 140 совгӏа моттиг хургья цига бахархошта. 2021-ча шера хьайийллар 50 сага моттигаш луш йола керда корпус. Кхоалагӏа, 40 сага моттигаш луш йола корпус хьаелла лерхӏ 2026-ча шерарча лакхе белгалбаьча аьттинга бетта. Вай Мехкадас соцам баь, «Дезал» яхача къаман проекта «Боккхагӏбараш» яхача федеральни проектага гӏолла чакхбоаккхаш лоархӏаме, боккха болх ба из. Ха яхача наха, заӏапхошта йоккха терко лоаттаеча вай мехкаа кулгалхочо, ше тӏахьожам лоаттабеш, дӏахьош ба из болх.
