Коталон белгало
ГӀалгӀай мехка кхаьчар «Котало» яха къаьнара цIермашин
Наьсарен цӀермашин наькъ тӀа лаьрххӀа духьалбахар «Котало» яхача цӀермашина, из хетаяь яр Сийлахь-боккхача Даьймехка тӀем тӀа котало яьккха 80 шу дузаш хилара. Цига хилар ГӀалгӀайчен кулгалхо Келаматанаькъан Махьмуд-Ӏаьла, республикан Паччахьалкхен кулгалхо Сластенин Владимир, иштта дукха хьаьший.
Ше къамаьл деш, Мехкадас белгалдир, шоай синош дӀалуш, моастагӀчунна духьаллаьттараш биццабар мел лоархӀаме да.
«Вай дай а цар дай а, шоай вахар дIалуш, эттар цаӀ санна мохк лорабе. Вай цӀаккха а дицде йиш йолаш дац, 27 млн. совгӀа волча сага шоай синош Ӏодаьхкар, моастагӀчунна духьаллатташ. Из ноахалгара ноахалга кхоачаш йола чов я», - аьлар Келаматанаькъан Махьмуд-Iаьлас.
Республикан Кулгалхочо белгалдир иштта, тыле къахьегаш хиннарий лерхӀам а чӀоагӀа хилар: «Уж лаьтта оахаш, дикагӀа йола цӀермашинаш, танкаш вӀашагӀйохкаш хиннаб, цо таро луш хиннай котало яккха».
Моаршал хоаттача дешашца къамаьл дир Къилбаседа Кавказа цӀермашиннаькъа «РЖД» ОАО филиала кулгалхочо Задорин Сергейс, цо белгалдир, гӀалгӀаша мах баь варгвоацаш дакъа коталонна юкъедена хилар.
ЛаьрххӀа йола цӀермашин хьакхоачаш, театра гойтамца духьалбахар. Из кийчо яьр яр цӀермашиннаькъахой культуран ЦӀен, иштта Ростовски паччахьалкхен наькъий университета кхоллама тоабаш. Концертни программа чудоагIаш дар майрал, денал гойтача, лакха паччахьалкхен совгӀаташ деннача Къилбаседа Кавказа бахархоех, ВОВ турпалхоех дола дувцараш.
Белгалду, «Котало» яха къаьнара цӀермашин дӀахо дӀаяхар Къилбаседа Кавказа цӀермашиннаькъ тӀагӀолла. Наьсаре кхозлагӀа соцаш яр из; Махачкалера, Гудермесера яьлча.
