Сохраняя память легендарных защитников Отечества
Укх шерара хьалхара болх дIаболабир тохкамхоша.
В середине февраля нынешнего года в городе воинской славы Малгобеке торжественно открыли «Вахту памяти — 2023», присоединившись к Всероссийской акции. В эти дни в Ингушетии проходит первый в нынешнем году полевой выход поисковых отрядов в рамках проекта «Малгобекский бастион». В нем принимают участие члены поисковых отрядов «Курган» (Нижний Новгород), «Малгобек» и «Патриот». Поисковые работы ведутся на высотах Терского хребта в старой черте города Малгобека.
Укх деношка ГIалгIайче, «МагIалбика бастион» яхача проекта чубоагIаш, карарча шерара хьалхара тохкама болх дIаболабеннаб.
Цига дакъа лоацаш ба «Курган» (Нижний Новгород), «МагIалбик», «Патриот» яхача тоабай доакъашхой.
Тохкама балхаш дIахьош да МагIалбика шахьара къаьнарча даькъ тIа, Тирка дукъ оалача моттиге.
«Дагалоаттама вахта-2023» хьаеллаш, из дар саькура бетта 19-ча дийнахьа, ГIалгIай Республике 13 шера баьча тохкама балхах дийцадар аз, цига вай мехкарча наьха таро хилар карарча шера бе лерхIаш болча балха дáкъа довза. «Дагалоаттама вахта-2023» лаьрххIа хьаеллача хана, цига хилар МагIалбика района муниципальни даькъ тIарча администраце кулгалхочун заместитель Мержой Iийса, ГIалгIай Республикан юкъарлен палата доакъашхо Гантемиранаькъан ЯрагIи, ГIалгIай Республикан дешара, Iилман министра заместитель ПхьарагIолганаькъан Мухьмад, юкъарлонна организацей кулгалхой, «Казначей» яхача гIалгIай тохкам беча тоабацара доакъашхой, тохкама урхаллен, Росгварде тохкамхой, студенташ, кагирхой, дешархой», — аьлар «Сердало» газетага Дзейтанаькъан Беслана, Даьхе бахьан байнарий дагалоаттама йолча Ерригроссе юкъарлон «Россе поискови болама» ГIалгIай отделене кулгалхочо.
Селхан дIаболабаьча балха тIа «Курган» оалача тохкама тоаба аьттув баьлар. Царна Тирка дукъ тIа шин цIеэскархочун тIехкаш корайир. Бакъда 1942 шера МагIалбик лораеш, Даьхе бахьан долаш лийгарий цIераш ха йиш йоацаш нийсденнад, цар цIи тIайолаш хIама цахиларах а майдалгаш цахиларах а.
БIаьстанара тохкама балхаш ГIалгIай Республике дIахьоргда тушола бетта (март) 18-ча денга кхаччалца, йоах Дзейтанаькъан Беслана. Цул тIехьагIа, тохкамхой селашкахьа дIагIоргба. Цига цар тохкаргда, Сийлахь-боккхача Даьймехка тIом лаьттача шерашка гIаьрхочо чудайта хиннача миха кема лараш мичахьа я. Тохкама экспедице доакъашхошца цхьана цар из болх дIахьу, «Кавказа йоагаш йола сигале» яхача бе-беча моттигашта юкъерча проекта чубоагIаш.
2023 шу Россе Кавказа а иштта берригача россиянашта а белгалдоалаш да. Вай массане а белгалдергда Кавказ лораеш моастагIчоа духьала лаьттача тIема 80 шу дизар, иштта МагIалбик лораеш йола тIема операци дIайихьа 80 шу дизар. Цу хана мехкдаьттан МагIалбика пенашка лийгар немций гIаьрхоех дуккхабараш, доккха Iазап лайра цар, Кавказа мехкдаьттан ганзаш, кхы шоаш йоаккхача хана моастагIаша караерзаергйоацаш, къаьстар из тIом.
Тохкам беш йолча тоабан доакъашхошта хьалхашка доккха декхар латт карарча шера, цудухьа цар балха тIа аьттув балар лов сона, вай Даьхе лораеш байнача бIухой цIераш малхайоахача, йиц ца йолийтача даькъе.
