ЦIаккха а дицлургдоацар
ТIема шерашка вайна кхы а бархI бIухо коравир
Коталон денна хетаяь дукха кхетаченаш дIакхихьар МагIалбике. ТIема шерашка вахар хаьда бIухой дIабохкаш хилар из болх дIакхухьача комиссен юкъера доакъашхой. «БIаьстан балхаш дIахьоча хана, корайир уж дIабехка баьхка моттигаш. Цу юкъе дакъа лоацаш хилар селий мехкара «Кавказ» яха бIухой лехаш йола тоаба, иштта хIирий мехкара «Поиск» яхар, Нижний Новгородера «Курган», вай мехкара «МагIалбик» яхараш. Корабаьча бIухой цIераш тахка аьттув баьннабац», — дийцар тхога уж нах дIабехка боахка моттигаш тохкаш лелача тоабан хьалха латтача Дзейтанаькъан Беслана.
Тирка дукъ оалача моттигера фашист вохавеш лаьтта бIухой дIабохкача, дакъа лоацаш хилар дукха вай мехкара бахархой. Цига баьхка хилар Паччахьалкхен Дума депутат БIарахой Бек-хан, республикерча юкъарлен палата кулгалду Iамархананаькъан Лейла, росгвардера, тайп-тайпарча болх-моттигашкара къахьегамхой, дешархой. Депутат волча БIарахой Бек-хана белгалдаьча тайпара, уж нах хьалахар вай массане декхар да. Фашист эккхавеш, котало вайна гаргайоалаеш, шоай синош Iодийхка нах ба уж. Иштта догмайра шоай декхараш токхаш латт вай сийдола къонгаш Донбассе. БIарахой Бек-хана гIо деш, дIакхухьаш ба тахан уж нах лехаш бола болх. Царна ийшача хIаман масса хана кийча ва из.
Тахан доккха баркал аьлар цу наха депутата. Юкъарлен палато а дикка новкъостал лоаттаду бIухой лехача болхлошта. Тахан берригаш ураотта безаш, доккха гIулакх да из. БIухой дIабохкача Iамархананаькъан Лейлас белгалдир, Даьхе лораеш, моастагIчун наькъаш тедаш лаьттача цу нахагара таханарча кагирхоша масал эца деза, аьнна. БIухой лехаш лелача болхлоша шоашта хьалхашка дукха лерхIамаш лоаттаду. Гуйре хьатIаотталца дIабахьа лаьрхIад цар из болх. Ахкан хана цар дIахьоргья Iилман-практически конференци. Кхувш латтача тIехьенна, бIухой лийга моттигаш дIахьокхаш болх дIаболабергба цар.
