Концерт дIахьош хиннараш бар, Россе цIихеза диктор Березин Владимири, вай мехка йовзаш йола телеведущи БIархой Элизаи. Дукха нах шоай берригача дезалца, берашца баьхкабар республика Ди дезде. Цу доккхача вIашагIкхетаре, республика хоза дешаш оалаш хьахьекхар, Россе президент Путин Владимири, Федераце Совета кулгалду Матвиенко Валентинаи.

Ший къамаьла юкъе вай Мехкдас белгалбир, къаман сийдола къонгаши мехкарийи, республика кхоане сийрда хилийта гIерташ дог лазарца къахьийга бола. Иштта хьоахадир, федеральни оагIонгара вай къаман латта доккха новкъостал, республико халача ханашкара, таханарча денга кхоачаш, хьабена атта боаца никъ. Келматанаькъан Махьмуд-Iаьлас хьоахабир, республика халача ханашка, дуккхача хIамашта духьала латташ, цхьаь къахьийгараш. Царна юкъе бар къаман хьал тоаде гIерташ, сийрда кхоане цун кхолла гIерташ салоIам боацаш лаьттараш. Доккха баркал аьлар республика кулгалхочо Россе доазол дехьарча диаспора, Россе Iеш болча гIалгIай къаман наха шоай мохк безаши лоархIаши, цун га Iоцадулаши хиларах. Бахархошка кхайкарал деш, массе хана цхьа барт-безам болаш, вIаши оагIув хьаллоацаш дIадаха деза вай аьлар цо. Ишттача наькъаца дIадолхе, моллагIа йолча халонашта духьала отта аттагIа хургда вайна аьлар.

«Аз даькъала дувц шо, мехкахой республика 30 шу дизарца! Ираз, аьттув, барт-безам болаш дахалда шо массе шерашка! Вай хIанзчул тIехьагIа атта доацача хIамашта духьала увтташ дукккха дикаш кхолла дезаш да. Цхьана барт-безам лорабеш дIадолхе, цхьаккха хIама хала хургдац вайна. Даьла къахетамаца, Цун низаца аьттув хургба вай дагалатта дикаш кхолла. Иштта нигат долаш болх бой, сийрда хургья вай кхоане. Вай Россе президентаца да! ГIалгIайче Россеца я!», — аьлар ший къамаьл йисте доалаш Мехкдас.

Доккхача концерте вай мехкара артисташ боацаш, Россера баьхка цIихеза нах бар. Иштта, цига хьайийлаяр къаман тайп-тайпара даараш кийчдаь кухни, кулгашца говзха хьакхелла дукха тайп-тайпара хIамаш яр хьокха оттаяь. Къаман оагIув хьахьокхаш долча хIамашца дог ловзаш бар мехкахой. Иразе, аьттонца бахалба вай хьамсара гIалгIай мохк! ТIом яха дош ца хозаш, Дала беркат лоаттадеш дахалда вай дерригаш!