Деррига кийча латтача Магасе гулбелар тха хьаьший, хIаьта из кхетаче дIаяхьара бахьан дар газета 100 шу дизар. «Сердало» редакце дуккхача шерашка хьинаре къахьийга, эггара халагIа йолча ханашка из наха юкъе доаржадеш, цун хIама Iо ца дожийташ, лаьтта болхлой дагалаьцар тахан. Цар хьабенача, чоалханеча наькъах дувцар гулбеннараша. Геттара дега тоам беш дар, вай массане дегашта боча болаш баха бисача нахах хьабаьннарашца, цхьан истола тIа вагIаш, ха дIаяхьар. Тахан цар цIераш яха лов сона. Цар даьй хиннаб: Дахкилганаькъан ХьакIаьша Ахьмад, Малсаганаькъан Мустабе Мухтар, Малсаганаькъан Мухтара Рашид, Пхьилекъонгий Ахьмада Идрис, Гадаборшанаькъан Боскара Осман, Маькенаькъан Абукара Асхьаб, Зангенаькъан Хасолта Микаил, Цисканаькъан Уце Мухьмад-Башир, Озанаькъан Къарамсолта Мурад, Угурчанаькъан Шовхала Азмат-Гири, Шаденаькъан Суламбика Хьусен, Гадаборшанаькъан Ювназа Або, Овшанаькъан Iазе Руслан, Хоаной Хьасамбика Мухьмад, Iарчакханаькъан Райхьант. Уж цIераш газето цIаккха а йицъергьяц!

«Беркате лар къаман журналистике йита дIабахаб шун гаргара нах. Оаха массахана масал эцаргдола, беркате нах ба уж. Газета вахаре даиман дахаргда цар дитар, цар хьаена сийрда лар! — аьлар ший къамаьла юкъе «Сердало» газета керттера редактор йолча Курскенаькъан Хадижата. — Дукха низ газета балха Iобиллаб цу наха. Тхьовра, эггара хьалха газет хьакхоллаш, из доаржадеш баьхарий никъ, сийдолаш дIахобихьаб цар. Бехктокхаме къахьега, эггара хьалхарча аргIагIа мехка хьал лораде, цун беркате гIулакхаш лархIа Iомабаьб цар биса журналисташ. Геттара хоза хет, шо дерригаш тахан укхаза гулденна. Оаш доаккхал де мегаргдолаш нах бар уж! Беркате хилда шун вахара наькъаш!».

«Сердало» газетаца дувзаденна хинна цхьаццадола хIамаш дийцар гулбеннараша. Масала, Iарчакханаькъан Райхьанта воIа дийцар, газете болх беш хиннача Къоастой Махьмада Башира даь хоза гIулакх. Баха фусам эшаш, геттара халача хьале эттача Iарчакханаькъан дезала, аргIагIа шийна хьакхаьча квартира дIаеннай цо. Цул совгIа, дезал боккха хинна, шерагIа, йоккхагIа фусам эшача кхаьчача, юха а ший аргIа царна йитай. Иштта догдика, беркате нах баьхкаб «Сердало» къахьегаш. Журналист, суртанча хиннача Овшанаькъан Руслана воI редакце бер долча хана денз ухар. Кадетски корпусе, Сурхо тIарча администрацеца къахьийгар цо. «Са вахаре а цхьа белгала моттиг дIалаьцар шун газето. Журналист хила ловш вар со а цхьан юкъа, бакъда деррига а хувцаделар... Редакце компьютерашца болх беш хиннарашца хьоашал дIатессар аз. Цар Iомавир со компьтерца къахьега. Иштта дезаделар сона таьрахьашца ювзаеннача технологей гIулакх. Из Iомадеш дIаваха, республикерча дешарен Iилмани гIулакхех йолча министерстве болх бир аз 10 шера, хIанз кердача балха тIа дIавехаш ва со...» Газета 100 шу дизарах йола майдилгаш екъаш, дIаходихьар из гIулакх. Майдилга куц оттадеш, из мишта хилча бакъахьа я къоастадеш, къахьийгар ва газета шеф-редактор вола Курскенаькъан ИбрахIим. Ший дега йIовхал, хоза начIал хьагойтад цо цу балхаца. Цхьа ший тайпара хоза, боккхача дезала юкъера гIулакх санна дIадахар майдилгаш дIаялар. Совлен хIама доацаш, беркате дIадихьар из гIулакх Курскенаькъан Хадижата. Озанаькъан Мурада воIа Тимура дIаийцар майдилг эггара хьалха. Цхьан хана газета редакце болх баь ше а дог чIехкаш вар из... «Могаш йоацаш хиларах, аьттув баланзар са тахан сай нана укхаза хьайоалае. Хьалха укх дунен тIара дIаваха ший даь-да дагавоагIаш вола сай воI воалаваьв аз. Доккха баркал оал аз, тахан укх газета керте латтарашта! Иразе хилда шун наькъаш. Дала гIо деш дахалда шо! Массанена санна, чIоагIа лоархIаме да сона а, сай да шоана дагавоагIаш хилар, цо баьча балха лакха мах оттабар», — аьлар цо.

Кхетаче дакъа лоацаш вар, ший журналиста никъ «Сердало» газетера дIаболабаь, «ГIалгIайче» яхача газета керттера редактор вола Боканаькъан Шамсудин. Таханарча журналистиках дийцар цо гулбеннарашта, хозача дешашца даькъалабийцар «Сердало» къахьегараш. Мишта йода ца ховш, дIаяхар ха... Хало дар къаста. Газета керттера редактор йола Курскенаькъан Хадижат дог тийша яр, иштта йола кхетаченаш кхы а хургхиларах. Цхьа боккха дезал санна, шоайла кхоачара ба хIанз берригаш! Цхьа барт болаш, цIена уйлаш кхееш вай дIадолхе, беркате хургба вайна массанена редакцера болх!