Бахархоша шоай хаттараш делар электронни адресага, видеокъамаьлага гIолла, эфир йолча хана телефоний гIонца. Массехк тайпара мехкадаь къамаьл хаза йиш йолаш бар бахархой. Республикан массе оагIонца дувзаденна хаттараш доашхаш хилар мехка кулгалхо.

Цо белгалдир, укх шера вай кхоачашде аьттув баьннараш, тIехьа тIайоагIача хана де лерхIараш. Мехкадас яхачох, 2023-ча шера АПКага гIолла мехка доалахьа хургба, Даьла къахетамца, 58 тонн Iажаш, 10 тонн москала дулх, 20 тонн помидораш, 90 тонн бIараш. Иштта белгалдир, укх шера республике 28 ишкол хьалъяьлга. ТIадоагIача шера вайцигарча ишколашка гIоргда 7 эзар бер. Хьинаре къахьегаш латт, хин гIулакх тоаде гIерташ. Юрташкарча, шахьарашкарча кулгалхошка, шоай моттигашта дизза доал деш хила, аьлар Мехкадас.

Къаьстта чIоагIа терко еш дийцар, Украинерча тIема доакъашхой дезалашта гIо лоаттадарах лаьца. Республикерча хьакимаша, иштта бахархоша шоашкара гIо-новкъостал даьд бIухошта. ТIема декхараш кхоачашдерашта дикагIа бола гIирс бахьийтаб, уж лорабе лаьрхIа. Мехкадас дийцар, тахан вайцига дIадоладаьча доккхача гIулакхех. УнахцIенонга хьажар, экономически хьал тоадар, кагирхой тайп-тайпарча хIаман тIехьа аьттув лехар, наьха вахара хьал аттачадаккхар духьа, цахаддаш болх беш ба мехка кулгалхой.