Мах баь варгвоаца гӀулакх
ГӀалгӀай паччахьалкхе хьакхоллача доккха дакъа лаьца Заьзганаькъан Идрис дагалаьцар Магасе
ГӀалгӀай къаман вахаре мах баь варгвоаца доккха дакъа дӀалоацаш къахьегаш лаьттача Заьзганаькъан Идриса сийленг оттадир Магасе укх деношка. Мехка исторе лоархӀаме моттиг дӀалаьца волча къаман эздийча воӀа сийленг Мехкадаь администраце цӀен духьала оттадир. Из хоам «Сердалога» бир Мехкадаь администраце.
Цу лоархӀамеча кхетаче дакъа лоацаш вар вай мехкада Келаматанаькъан Махьмуд-Ӏаьла, Заьзганаькъан Идриса гаргара саг Тоачанаькъан Светлана, иштта депутаташ, юкъара болх бераш.
ХӀара шера ахкан шоллагӀча Бетта 7-ча дийнахьа дездеча, 1924-ча шера РСФСР юкъе гӀалгӀай автономни область хьакхоллара денца дувзадаь, гӀалгӀай паччахьалкхен 100 шу дизара хетадаь дар из гӀулакх. ГӀалгӀайчен исторе чӀоагӀа лоархӀаме, къамо ший никъ хьаийца, дегӀада доладенна ди да из.
ГӀалгӀай автономни областа хьалхара кулгалхо вола Заьзганаькъан Идрис къаман вахаре дукха хӀама даь, сийдола воӀа волаш дӀавахав. Цхьаккха бехк боацаш, къам мехкахдаьккхача а, доккха Ӏазап токхаш хийрача мехка лийлача а дайнадац, даха дисад дуккхача шерашка цу денал долча воӀа даьр!
Заьзганаькъан Идриса оттадаь сийленг кхоана ураотта безарашта доккха масал гойташ дола дӀаьхий, лоархӀаме истори да. Ший къам дезаш, цун паргӀато яккха гӀийрта саг дагалаьцар бахархоша цу дийнахьа.
