Гӏа нийсбеш, къонача тӏехьено доаккхалца беелла дӏахьош яр шоай цхьанкхетарий белгалонаш йола байракхаш. Цу кхетачено хьагойтар мел лоархӏаме ба берий боламашка дӏахьош бола кхетам балара болх, тахан кхувш йоагӏача тӏехьен мах бараш довзийтар, юкъарлон цхьоагӏо чӏоагӏъяра из эшаш хилар.

Цӏай дӏахьочар хьинар хоалуш дар. Гӏаш наькъа баьннача хана, шоай цхьанкхетарий гимн локхар, цунца цар хьагойтар шоай тоабаш барт болаш хиларах доаккхал деш хилар, шоай Даьхенцара безам боккха хилар. Цу дено хьагойтар, Магӏалбика хургдар, из тешамеча, ше езача кулгашка хилар.

Цу цӏайн эггара чӏоагӏагӏа теркам тӏабодаш хинна моттиг яр, хьинар гойтараш Ерригроссийски берий тӏема-патриотически «Къонача эскаре юкъе» дӏаэцаш хиннар. Цу оагӏоно хьайийллар шоай никъ Даьхен гӏулакх дара хетабаьча берий вахаре керда оагӏув.

Шоай гӏулакха тешаме хила чӏоагӏо ярал хьалха; моаршал хоаттача дешаца къамаьл дир хургболча къонача эскархошца «Къона патриот» яхача тӏема-патриотически кхетам балара, тӏема амал де кагирхой кийчбара Центра кулгалхочо, «Къонача эскархой» Ерригроссийски берий-ондаргий тӏема-патриотически юкъарлон болама моттигерча отделене штаба кулгалхочо Муружанаькъан Мухьмада.

Цо даькъаладийцар бераш мехка лоархӏамеча патриотически болама мугӏарашка уж оттарца, цо аьлар, ше тешаш ва, даьй дика гӏулакх цар дӏахо дӏахьоргхиларах. Иштта цо бераш тӏахьийхар шоай хьамсара мохк а, еррига Росси а лораеш, доккхий гӏулакхаш дахаш хургдолаш шоай никъ цар цӏена лелабара.

Уж дешаш аьнначул тӏехьагӏа, бераш шоай хьехамчашта, новкъосташта хьалхашка еза чӏоагӏо йир. Цар дош делар шоай Даьхе езаш хила, болама нигат кхоачашде, дика дешаш хила. Магӏалбика къонача эскархой вошало тӏаийцар ший мугӏарашка чӏоагӏа, тешшаме, Даьхенна мутӏахьа бола низ. Лаьрххӏа дола цӏай дӏахьош, дӏахо «Къонача эскара» керттера белгалонаш елар.

Хӏара доакъашхочоа дӏаделар хьалхара лаьрххӏа дола тешал, иштта ший цӏи тӏайола наькха тӏа боаллабу седкъилг. Из сийлен балха дакъа дӏахьош вар Муружанаькъан Мухьмад, иштта «Бералла наькъаш» яха Ерригроссийски проект лелаю Колой Саӏид.

Берашта из чӏоагӏа лоархӏаме дар, цар уйла соцаш яр дешара, спорта, волонтерий, дика гӏулакхаш дара даькъ тӏа хьалхарчарех хилара тӏехьа. Шоашта хьаденна седкъий бераша доаккхалца барзкъан тӏа дӏадехкар - хӏанз уж ба бокъонаш йола боккхача мехка патриотий чӏоагӏача тоаба доакъашхой.