Кагирхой, юкъерча ханага кхаьча бахархой шахьара юкъерча моттиге дега тоам беш ха дӏахьош хургба каста. Цу  оагӏонцарча министерствонна хьалха латтача Белхарой Руслана белгалдечох, спортаца бувзам лелабе ловш бола кагирхой, иштта юкъерча ханага кхаьчараш хӏара денна дукхагӏа ба. Ма дарра аьлча, дега чӏоагӏа тоам беш, гӏадвугаш хӏама да из. Цунга хьежжа, цу наха паргӏатта ха дӏакхахьа боаггӏача боараме тоаяь моттигаш хилийта еза вай тахан.

«Кадай хила ловшраш тӏалатташ йола беркате моттиг хургья цох, шеко йоацаш», - дийцар цо. Шахьарерча администраце хьаллоацаш, гӏо деш дӏахьош болх ба из. Наьсарен мэр вола Оздой Руслан спорта гӏулакхех йолча министерствон кулгалхочо белгалдечох спорт йоаржаяр, цу оагӏонца къахьегар чӏоагӏа дезаш, могаш дола гӏо де хьожаш ва. Цудухьа моллагӏа цу оагӏонцара декхараш кхоачашде, керда моттиг хьаелла аьттув боал  тахан.

Спорта лаьрхӏа керда доазув тоадеш хилар вай мехка лоархӏаме гӏулакх да. Ма хулла дукхагӏа кагирхой, бераш спорте чуоза дезаш да вай тахан. Спортацара шоай говзал, начӏал кӏоаргде, тайп-тайпарча оагӏонца белгалбала аьттув хургба къонабарий. Тахан дер дайна, зехьа ха йоаеш, бувлабенна лелачул дикагӏа, пайданегӏа деций спорта моттиге хьабаьхка цаӏ, шиъ сахьат доадича, шоай дегӏа хьал меттаоттадеш къахьийгача? Спортаца кхоачарле лелаеш болча дуккхабарашта-м бокъонца дола совгӏат хиннад цу гӏулакхах.