«Доакъашхошта, хьаьшашта юкъе бар лоархӏаш бола юкъарлон викалаш, дина керте латтараш: Межиев Салахь, Цӏолой Хизар, Гацалов Хаджимурад, Харсенаькъан Мухьмад, Йовлой Ахьмад. Къаьстта цига белгалдоалаш хилар Пригородни кхаленна тоабо котало яккхар. Спортивни кхетаче дӏаяхьар, Дербичанаькъан Хизарах бола дагалоаттам хинна а ца ӏеш, лоалахарча республикай бахархой вӏашагӏкхетара тешал дар. Цу тайпара кхетаченаш дӏахьош хиларо чӏоагӏбу лоалахошцара барт, шоайла лерхӏам хилар, къамашта юкъера ӏадаташ лорадар», - аьлар «Сердало» газетага Гӏалгӏайчен Миннаце.

Бархӏ шу даьннача кӏаьнка, Дербичанаькъан Хизара карагӏдаьнначо, юкъера юкъ дӏа а яьккха, вӏашагӏтехар еррига Даькъасте. Карарча шера аьхки, цун исторе миллионаш бола нах цецбаьхар, цох хилар денала белгало.

2026 шера, аьтинга бетта 15-ча дийнахьа, Илдарха-Гӏалан зӏамига кхо новкъост ловзаш ваьллав Шолжа берда тӏа. Догӏаш делхарах из хий чӏоагӏа шийла, айденна, унзара доагӏаш хиннад. Царех цхьа кӏаьнк, цӏаьхха, ког лайжа цу хи чу вежар. Хӏаьта сихденна додача хиво из лаьцавар, бакъда берда тӏаяьннача гаьнах тоссаваларах висар из. Зӏамигача Хизара тамашийна денал гойташ дола гӏулакх хьахьекхар цига. Цо аьлар, цул тӏехьагӏа берригача мехка цӏи хеза хинна дешаш: «Ай, маӏанах деций вай… Хьалваккха вай из!»

Кӏаьнк, цу сахьате кхы уйла ца еш, додача шийлача хи чу чутоссавелар. Хизара карагӏдаьлар хиво ӏохьош хинна ший новкъост бердагахьа дӏататта, из бахьан долаш гаьна ткъовро лаьца, боккхагӏбарий новкъостал тӏадена, из хьалваьккхар. Бакъда ший вахар кӏалхардаккха мегадац къонача турпалхочоа; шийлача, унзарча Шолжа хиво вихьав Хизар. Цунна карагӏдаьнначо вӏашагӏтехар дукха къамаш. Цу гӏайгӏано гулбир тайп-тайпарча къамий викалаш.

Лахара-кӏалхарваккхара операци дӏайихьар 8 дийнахьа. Ерригача Къилбаседа Кавказа миӏингашкара итташ эзараш бола нах вӏашагӏкхийтар. МЧСа оарцагӏъурашца, Росгвардеца, ОМОНа бӏухошца цхьана хӏара дийнахьа ша санна шийлача хи чу боалар нах. Уж бар Гӏалгӏайчен, Нохчий Республикан, Селий мехка, Къилбаседа Хӏирийчен, Гӏаьбартой-Балкхарой, Къарший-Черсий, иштта Россе кхыча моттигашкара баьхка нах.

Из лохаш бараш шоайла хувцалуш, километраш тӏехьаюташ, хий дӏакъувлаш, къахьегаш хилар цу деношка. Лоалахарча республикан бахархоша маьждигашка дуӏаш дора, Даьлагара зӏамига Хизар коравар дехаш. Из бала шоай юкъара ца хеташ саг вацар, ерригача Даькъасте цу деношка.

Аьтинга бетта 22-ча дийнахьа кӏаьнка дакъа корадир, из хатар нийсденнача моттигера 17 километр гаьна. Зӏамига турпалхо тӏеххьарча новкъа ваккха баьхкар тайп-тайпарча къамий эзараш бола нах. Хизара даьй фусаме уж боалабир юкъарча балано, иштта доаккхало.

Из дӏаволлача хана, шахьара урамаш дӏалаьцар селлара дукха нах болаш, цига таьзета хиннача 85 шу даьннача дин викало тӏахьийхар маӏа нах, шоай къонгашта Хизара аьнна цӏи тиллара, ший лоаццача вахара хана иштта дукха нах гулбе денал хиннача турпалхочун сийна. Къонача гӏалгӏай турпалхочун Дербичанаькъан Хизара сийле дӏахо яхаш я, къамаш вӏашагӏтохаш. Гӏалгӏайчен Кулгалхочо лаьрхӏар цун цӏи малхаяккха, цӏаккха а йовргйоацаш.

Бетташ даьнначул тӏехьагӏа, бакъдунен тӏа кхаьчача зӏамигача Хизара сийна, Даькъасте дагалоаттама культуран, спортивни кхетаченаш дӏахьош я, цо цхьана гулбу лоалаха ядача республикай викалаш, цунца хьагойташ дикал, денал, къахетам боарам боацаш хилар.