Сийдола моттиг
СВО Къаьге хьаеллаш, лоархӏаме кхетаче хилар Магасе
СВО Къаьге хьаеллара хетаяь лоархӏаме кхетаче дӏаяхьа гулбелар Магасе. Тахан Даьхен гӏулакха арабаьнна; тӏема аренашка латтарий денал, майрал, яхь хилар белгалдеш; гӏулакх да из. Гӏалгӏай мехкара бӏухой; шоай декхараш бехктокхаме, боаггӏача боараме кхоачашде хьожаш; хьабоагӏаш ба хьалхарча дийнахьа денз. Цар сийленна хетаяь яр челханара Къаьге. Цу лоархӏамеча кхетаче дакъа лоацаш бар мехка кулгалхой, юкъарлон, ветераний оагӏон доакъашхой, студенташ, дешархой, дийша нах, иштта тӏема операце доакъашхой дезалаш, гаргара нах. Гулбеннараша белгалдир, Магасе из Къаьге хьаеллар тӏема аренашка деналца дӏабайзача вай къаман яхь йолча къонгий оагӏув хьаллацар, царца лерхӏам хилар долга.
«Кхетаче дукха кагирхой гулбеннабар – къона эскархой, кадеташ, дешархой, студенташ. Из къаьстта лоархӏаме дар цу моттиге. Иштта йола моттигаш хьаеллар турпалий цӏераш йовзийтара тӏехьа лоархӏаме хиларал совгӏа, ураотташ латтача къонача тӏехьенна шоай Даьхен истори ма дарра довзийта, цун гӏулакхе латтараш малагӏча халонех чакхбаьннаб дӏахайта эш. Тӏема аренашка къонгаш байнарашта къаьстта хала, дега ӏоткъам беш хул иштта йола моттигаш. Дагалоаттама кхетаченашка санна, массахана царна уллув, цар оагӏув хьаллоацаш, низ дӏа ма кхоачча новкъостал де хьожаш, хила деза вай. Тӏема аренашка цӏа ца боагӏаш бисарий цӏераш къаман исторе массахана яхаргья!
Тахан тӏема операце моттигашка декхараш кхоачашдеш латтараш могаш, маьрша болаш шоай дезалех кхеталба! Магас-Шахьара вахаре лоархӏаме моттиг хургья СВО Къаьгех. Дешархой, ветеранаш, шоай берашца дай, ноаной тӏалаттаргба укхаза. Дагалоаттама деношка доацаш, массахана «дийна» хила еза ер моттиг. Нах тӏалаттаргболаш, бӏухой цӏераш ешаш, уж биц ца беш хургболаш», - аьлар вай мехкадас Келаматанаькъан Махьмуд-Ӏаьлас.
СВО Къаьге таханарча бӏухой тӏема никъ баьшераш даьлча а бовзаш хургболаш дагалоаттама улгаш оттадир. Кхоана кхувргйолча тӏехьенна, Даьхен хӏама лораде ураэттача къаман майрача къонгий истори довзийташ бола болх ба ала деза цох. Даьхен гӏулакха арабаьннараш мехкахоша, республике кхаьчача хьаьшаша дагалоацаш моттиг хургья цох.
Магаса 3-ча зӏамигача кхален 170 метрага кхоачаш, Горчхананаькъан ӏ. цӏерах болча урамгара Коталон Парка ӏотӏаотталца долча доазонах культуран, Даьхенцарча лерхӏама, цунцарча безама моттиг хилар. Белгалде деза, из болх Россе Президента Путин Владимира чӏоагӏонца йоаржаяьча вахарерча гӏулакхех йолча къаман проекта «Шахьарера моттигаш тоаярах йолча» федеральни проектага гӏолла дӏабихьалга. Гӏаш леларашта дехьабовла къоастадаь доазув да цига, иштта таханарча ханага хьежжа дола гӏандаш оттадеш, сийрда, хоза лампаш йохкаш, нувхашта лаьрхӏа яьшкаш оттаяь, деррига доазув баьццардерзадеш къахьийгад гӏишлонхоша. Керттера моттиг дӏалоацаш да цу берригача балхаца лакха моартол, йоккха белгало йолаш тоадаь мемориальни доазув.
2025-ча шера Магасе хьайийллача, Москверча Александровски бешара массаза йоагача цӏерцара ала боага, Волгоградерча цӏихезача Коталон Миха га ягӏача Коталон Парка хӏама дӏахохьош, хьаллоацаш болх ба ала деза таханарчох.
Деррига а ший тайпара хеталуш моттиг я ер! Магасе СВО Къаьге хьаеллар Россе къамаш цхьанкхетара Шерца нийсделар… Боккхача мехка тайп-тайпарча къамех бола къонгаш ба тахан, тӏема аренашка вӏаший тӏаотташ, Даьхен гӏулакхе латтараш. Тхьоврача шерашка, геттара хала денош латтача хана денз, Россе хьадахьа ӏадат да ала деза цох тахан.
Даьхен гӏулакха ураоттар яхар атта боаккхалуш гӏа бац! Гӏалгӏайчен керттерча шахьаре СВО Къаьге хьаеллар цу наьха гӏулакх диццадар, цар оагӏув хьаллаца ловш хилар да. Кхоанарча тӏехьенна, дийна а долаш, дӏадовзийта деза шоай къаман доккха истори. Дукха къонабараш тӏалатташ моттиг хила еза цох. Тӏехьа тӏабоагӏарашта таханара вай къаман къонгаш мел яхь, денал, майрал йолаш хиннаб дӏахайташ хургда из гӏулакх. Республикан исторе цӏаккха а дӏайовргйоацаш дӏаязъяь латташ я цу наьха цӏераш, цар турпала гӏулакх дицдергдац, лард хинна, къаман къонабараша масал эцаш дахаргда из!
