Доккхийча хувцамий наькъ тӀа
Шолжа кхале дика кхоачашъеш я; «Фусам, шахьара хьалаш» яха къаман проект
ВорхӀ шу хьалха Шолжа кхален Ӏаьдало, дика дакъа лоацаш, кхоачашъе дӀайолайир «Фусам, шахьара хьалаш» яха къаман проект. Из бахьан долаш дукхача доазонаш тӀа хувцамаш хилар.
Бокъонах ахча хьахьожадер республикан бюджет я, бакъда ший белггала бола материальни бехктокхам хьалхашка латт кхаленна а.
ВорхӀ шера Шолжа кхален 16 юкъарча доазон тӀа хувцамаш хилар. Къаман проекта совгӀаташ дир Арште, Берда-Юрта, Алхастен бахархошта. Таханарча хано дӀаеххача боараме йола физкультурно-унахцӀенон комплексаш, иштта 20х40 метр йоккха футбола майдаш хьайир цига.
Уж балхаш дӀахьош администраци хьожаш я дика хьалаш хьакхолла, урамашка гӀашлой кхерамзлен Ӏалашо е, юкъарча моттигашка сердал хилийта, наькъал сехьавалара моттигаш ӏалашъе, машинаш дӀаоттае лаьрххӀа йола моттигаш хьакхолла.
2024 шера хоза кулг теха лостам бир Эбарг-Юртарча Багаева урам тӏа. Юкъара хьаийцача цу гӀулакха лаьрхӀа республикан бюджетера хьожадир 6,82 млн сом.
Из доацаш а, гаргагӀорташ да Гӏажарий-Юртарча парка даькъ тӀара тоадара балхаш. Иштта, Дьякова урам тӏа Ӏодехкаш латт гӀашлошта лаьрхӀа дола наькъаш, берий ловзара майда, гӀандаш оттаду, нувхаш чутувса гӀирсаш латт царна уллув, деррига доазув сийрда да.
Из никъ эшаш хилар дӀа а лоархӀаш, укхаза гонахьара карт тоаергья, цу даькъ тӀа асфальт а булларгба.
Кхален кулгалхочун гӀончас Коазой Адама яхачох, уж моттигаш тоаяра дӀадахийта лаьрхӀа ахча да 8,3 млн сом.
Кастлуш, моттигера бахархой шоай мукъа ха дӀаяхьа йиш йолаш хургба цӀенача, сийрдача моттиге, салоӀама эшаш мел дар долаш.
2018-2025 шерашка, къаман проектах дола балхаш деш дӀадахад 69,62 млн сом. Из а деррига дац, де лаьрхӏачунга хьежача.
Ерригроссийски яхье, доазонаш тоадара кхадж тессача, дукхагӀа болча наха ловш хилар 2026 шера тоадеш дола балхаш дӀадахьар Эбарга-Юртарча Марзенаькъан, Шефски урамашка. Из да, хьатӀадоагӀача шера из доазув вайна кердадаьккха гургдолга.
Белгалдаккха деза, деррига балхаш дӀахьош хилар бахархоша дакъа лоацаш. Къаьстта уж ба Ӏаьдалгара вахара хьалаш тоадар дехараш, хӀана аьлча вайга массанега кхоачаш да дика хьалаш хилар.
Вайх хӀаравар сатувсаш, хьежаш ва хувцамаш хиларга, юкъара гӀулакх бахьан долаш хӀаравар кийча ва шийгара дакъа юкъедахьа. Дика хьалаш хиларо уж моттигаш безамегӀа ю. Цул совгӀа, кхерамзле йолаш а, наьха вахар тоадеш а я уж.
