Из кагирхой кхетаче дӏаяхьара хьакхеллар лаьрххӏа йола тоаба: Франко-Гӏалгӏай центра викал, Франце къоаной Совета викал (Далганаькъан Сулейма, Лаьнанаькъан Рашид), Германера юкъарлон болх лелабераш (Беканаькъан Мустафа), Бельгера (Мержой Закре, Гӏазакханаькъан Гирихан), Парижа ассоциаце викал (ӏарчакханаькъан ӏумар), иштта кхыбараш.

Кхетаче дӏайолаелар лоархӏамеча хаттарца: «Арахьа баха гӏалгӏай кагирхой: таронаш, белгало, дегӏаахар». Шоай университетерча хьалах, из яьккхачул тӏехьагӏа де лерхӏачох дийцар: ӏарчакханаькъан Миланас (Париж), Лаьнанаькъан Райхьанта (Париж), Бӏарахой Данас (Брюссель), Боканаькъан Элизас (Люксембург), Беканаькъан Данас (Гамбург), Султиганаькъан Лиона (Брюссель), Овшанаькъан Мухьмада (Бельги), Далганаькъан Аминас (Страсбург), Мержой Хьавас (Бельги), Оздой Амира, Султиганаькъан Мухьмада (Страсбург).

Шоай спорта толамех лаьца дийцар кхетачен доакъашхоша Далганаькъан Ислама (Страсбург), Тӏоманаькъан ӏаддала, Йоакъапа, иштта Озанаькъан Ахьмада, Ислама, Илеза.

Цул тӏехьагӏа, кхетачен доакъашхоша дийцар гӏалгӏай мотт лорабе безарах, цун ӏадаташ, культура йиццаярах. Вай ӏадаташ дикагӏа довзийташ «Вендетта» яха гӏалгӏай режиссёра Доврбиканаькъан Ӏимрана даьккха исбахьален фильм гойтар. Цунга гӏолла го йиш яр цхьа бӏаь ах бӏаь шу хьалха хиннар. Фильмо дувц гӏалгӏашта лоархӏаме долча дешаех, цар хьалхарча ханашка хиннача вахарах, гӏалгӏай ӏадатех пхьа битар сенца дувзаденна да, сий лорадар, кхыдола къаман лоархӏаме ӏадаташ малагӏаш да. Из истори геттара терко тӏайохийташ довзаш хилар гӏалгӏай кагирхой, студенташ. Вай ӏадаташ, къаман гӏулакхаш дувцаш фильм гойташ хиннача иштта къамаьл а дир Франце къоаной Совета кулгалхочо Далганаькъан Сулеймас, цо дийцар Доврбиканаькъан Зинас могадеш долча гӏалгӏай «хьоалчагӏах» лаьца.

Далганаькъан С. яхачох, хӏанз латташ дола хьал вай уйла е езаш да. Вайна гуш да гӏалгӏай хьоалчагӏаш тахан саг цецвоаккхаш шоай тайпара дийрзалга, цу юкъе ца доалаш кердадар дисадац, яхаш, дийцар къамаьл даьчо. 

 Лоархӏаме дакъа дӏалаьцар цу кхетачене халкъашта юкъера дипломаш даларо: «Гӏалгӏайчен арахьарча мехкахой таронаш» доаккхал де дезаш я. Вай студенташа, гӏалгӏай кагирхоша, цхьайолча хана ди-бийса ца къовсаш, къахьегаш даьха толамаш да уж. Дика хеташ тӏаэц тахан вай арахьа бахача кагирхоша дешара а спорта а доакъош тӏа иштта дика таронаш хилар. Арахьа баха вай кагирхой хьаллацара йола вай проекташ дика накъайоал начӏал долча кагирхошта: кхувш йоагӏача тӏехьено шоай академически таро лакхъеш хиларца, цар котало яккхарца вай дог гӏоздоал. Вай цхьан моттиге латташ дац, тешшаме гӏа боаккхаш, дӏаходолхаш да.

Кагирхой кхетаче чакхйоалаш, кагийча наха, мехкарашта ловзар оттадир.

Боканаькъан ӏийса