«Доазол арахьа бахаш болча гIалгIаша лакха терко ю, шоай дезалий дешара. Вахара наькъашка дийша хилар, эггара лоархIамегIа долга ховш, из моттиг лакхача боараме лорае хьож уж. ГIадвугаш да, таханарча кагирхой дешарца, спортаца, цхьаццадолча кхоллама балхашца безам хилар. Тоъаргда аьнна ца хеташ, дIахо дIа а къахьега ловш хул къона мехкарий, кагий нах. Дикка хьежача, геттара боккха аьттув болаш да таханара кагирхой гIулакх. Деша а, дийша баьлча, дикача моттиге болх лаха а вIаштIехьа да цар, цу наькъ тIа къахьеге», — дийцар тхога франко-гIалгIай тохкама моттига кулгал деш волча Боканаькъан Iийсас.

Испанерча Барселоне вахаш волча Султиганаькъан Адамах да тха таханара дувцар. ЦIихезача реставратора, Султиганаькъан Рамзана воI ва Адам. Бера хана денз, жIакех ловзар хоза хеташ, хьалкхийнав Адам. Дуккха хIамаш довза чам болаш, сатем, сабар долаш кхийнав из. Ше вахача моттигерча дикагIболча жIакех ловзарашта юкъе вар из йоккха юкъ ялалехь, тIаккха 12 шерга кхачанза болча, лакха говзал йолча Испанерча жIакех ловзарашта юкъе хилар. Испане дIайихьача тIехьарча чемпионате, хьалхабаьннарашта юкъе нийсвелар из. Сантьяго- де-Компостела яхача шахьаре дIаяхьа лерхIача цу спортах йолча чемпионата юкъевихьар вай мехкахо.

Бакъда, вахаре нийслуш дола цхьацца кхоачамбоацараш бахьане, цига кхача аьттув баланзар Адама. Тахан Адам чIоагIа безам болаш ва, Кембриджа университетерча лорий факультете деша отта. Великобритане ваха кийчо еш, испаний мотт харал совгIа, ингалсий мотт а Iомабир цо. Тахан цун 16 шу даьннад. ДIадахача шера, Лондонерча колледже ингалсий меттацарча декхарех чакхваьнна, Великобритане ваха дIавахав из. Кембриджа университете деша отта лаьрхIа болча кагирхошта, геттара лакхача боараме хьехаш колледж я Лондоне Адам деша вагIар. Иштта къахьегаш дIаводе, шеко яц, Даьла низаца, ше сатувсачунга из кхоачаргхиларах. Адама геттара лоархIаме да тахан, беррига низ дешара дIатIабахийтар. Аьттув болаш, иразе хилба цун никъ! Дала гIо долда цунна дикача хIаман тIехьа!