Заремай никъ дӀаболабелар турпалча МагӀалбикера - ший бахархой, цхьоагӀо йолаш, яхь йолаш кхебаь истори долча шахьарера. Зӏамига йолча хана денз, из яр кхоллама наькъа тӀакхувш. Цо дика дакъа лоацар исбахьален балха даькъ тӀа, цун кулгаговзало боккхагӀбараш цецбоахар. Цун бе кхаьчача таьх тамашийна гӀирсаш хьахулар, боккъонца йола искусство.

Из къахьегама тӀера хилар, лаьрхӀачунга кхача гӀерташ хилар хоалуш дар кхы а 2001 шера Къилбаседа ХӀирийче дӀабихьача исбахьален гойтаме, цига цо котало яьккхар. Ший тайпара кӀоарга, хоза баьча балхо хьабийллар цунна Москве бода никъ.

Цу толамах хилар хьалхара лоархӀаме урок а, цунга кхачара начӀал хиларал совгӏа, дикка къахьега а дезар.

ЛерттӀа дешар дийша яьнначул тӀехьагӀа, цкъа хьалхагӀа экономикани-бокъони лицее, цул тӀехьагӀа Къилбаседа Кавказа РАНХиГС филиале деш, Зарема латтар дикача наькъ тӀа, из балха яха йиш йолаш яр юриспруденце е паччахьалкхен гӏулакхе. Дипломо хьаеллар цунна хьалхашка наӀараш Ӏаьдала кабинеташка, йоккхача компанешка. Бакъда дего хьехар цунна кхыбола никъ.

Цо лаьрхӀар, дикка уйла а яь, хьалхарча аргӀагӏа хала а йолаш вахара оагӀув хьалаца - юкъарлонна гӀулакх дар. 2010 шера денз дика дӀайолаелар из халача хьале бисача наха гӀулакх де. Бакъда кастлуш из кхийтар, дӀа-юха декъаденнача низаша доккхий дешаш кхоачашдергдац. Иштта 2018 шера ший хьамсарча МагӀалбике цо хьакхеллар вахара кӏийле йола проект- «Дикача гӀулакхий дуне» яха ганз.

Охценаькъан Заремас кулгал деш, из хӀанз мара дӀайолалуш йоаца моттиг, дукха ха ялалехь йоккхача профессиональни организацега кхаьчар, цох хилар наха новкъостал лоаттадеш йола бӀарчча «майда». Цун тоабо гӀо ду дукха дезал барашта, таро йоацача наха, иштта лорий гӀо лоаттаду, цо кхоачашъю дешара, салоӀама берашта лаьрхӀа йола проекташ.

Къаьстта цахадаш из гӏулакх дӀадодаш хиларо белгалбоах ганза болх. Охценаькъан Заремас кхетаду, къахетама ганз - из духхьал «чкъаьра балар дац, из чкъаьра лаца ӏомабар да». Цудухьа ганзо шийна могаш дола новкъостал ду, цкъа хьежа а ца Ӏеш, бӀарччача дезалашта даим пайда луш хургйола вахара оагӀонаш лохаш.

Охценаькъан Заремай профессионализм, цо юкъарлонна беш бола пайда теркал ца беш бисанзар. Цунна карагӏдоалачун мах оттабир тайп-тайпарча моттигашка. 2001 шера «Сириус» яхача берий центро могадеш хиннар дика тӀаийцар ерригроссийски «Шера дикагӀа йола проект» яхача яхье. 2022 шера из проект хьаллаьцар моттигерча гранта кепара, из эшаш хилар белгал а деш.

ГӏалгӀай Республикан паччахьалкхен викалаша цкъа аьнна Ӏийнадац цунна баркал, болх дика дӀабахьарах. Карарча шера ГӏалгӀай Республикан Кулгалхочо баркал аьлар цунна, иштта Халкъа Гулламо сийлен грамота елар.

«Ворхӏ ялата ка» яхача халкъашта юкъерча кхетаче Москве цун болх иштта белгалбир дипломаца, ислама къахетам боаржабарах.

Охценаькъан Зарема - из кӀийле я таханарча дикача гӀулакхий, цо цхьана дӀахьу къахетам а кӀоаргга профессионала хьаькъал а цхьанкхеташ бола болх. Из дукхача бӀаьшерашка денз хьадоагӀа гӀалгӀай юкъарлон Ӏадат дӀахьош хинна Ӏац, уйла а еш, из чӀоагӀду цо дӀахо, хьагойт дег чура къахетаме волаш, масса оагӀорахьара ший болх бовзаш хиларо, кхыметтел бӀарччача мехка вахар а, дикача оагӀорахьа тоаде йиш йолга.

Цун истори - из чӀоагӀа хозаш доаца, бакъда лоархӏаме хилар хьалхадоаккхаш да, эггара чӀоагӀагӀа дола вахара хувцамаш доккхача кхайкаралца доладе дезаш дац, уж хила деза шорттига, хӀара денна, тӀатеӀӀа дӀахьоча балхагара долалуш. Уж гӀулакхаш дувзаденна хул дӀалуш хиларца, юхадоагӏачунга са а ца тувсаш, кхыметтел эггара зӀамагӀа дола гӀулакх а – из я «дикача гӀулакхий дунен тӀа» Ӏойилла кирпишк, цун цӀи доаккхалца а бехктокхамца а лелаю Заремас.

Охценаькъан Ислам