Шоай гӀулакх дика довзаш болча лорий кулгашта кӀалха нийсваларах, боккха аьттув хилар Ӏийсай. Уж нах, духхьала молхашца дарба даь ца Ӏеш, шоай хозача оамалашца унахо верзаве, цун лазар дайде ховш ба. «Телевидене гӀолла дайра сона, вай Мехкадас дикагӀбола лораш белгалбеш. Геттара дог хьоасташ, сурт дар из! Бакъда сона хала хийттар дар, белгалбаьча лорашта юкъе, сайна дарба деш лаьттараш цахилар... Шоай декхараш дизза чакхдоахаш, унахошца къахетаме, безаме болаш лораш ба уж а!» — язду Ӏийсас. Цо доккха баркал оал, МагӀалбикерча дарбанче керттера лор йолча Сампенаькъан Лидайна. Из цу моттиге хьатӀаеначул тӀехьагӀа, дарбанчера хьал дикача оагӀорахьа хувцаденнад. Массехк шера болх ца беш лаьтта лифт тоадаьд, хьалха, дукха ха йоаккхаш латта везаш хиннача регистратуран болх эргабаьннаб. Хозача дешашца, доккха баркал оалаш бувц Ӏийсас, цигарча дарбанчера кардиолог ЦӀечой Мадина, бӀаргий лор йола Пхьилекъонгий Радимхан. «Шоай деррига вахар унахошта хетадаь нах ба уж! Шоай болх дукха безаш, могаш боацарех дог лазаш, къахьегаш латт уж», — язду Ӏийсас. Белгалде деза, Ӏийса лор ЦӀечой Мадина йолча учёте латтилга, Пхьилекъонгий Радимхан йолча а каст-каста кхача везаш хул цун. Цудухьа цунна дика бовз уж лораш. «Лакха говзал йола лор ва, Наьсарерча дарбанче болх беш вола кардиолог Марзбиканаькъан Темарлан. Сога хьожаш хиннав из, цо дӀахьожавир со операци е Москверча клинике», — язду Ӏийсас. Ше яздеча каьхата тӀа цо дехар ду, цу лорашта доккха баркал оалаш. терко е яхаш. Оаха, вай унахцӀенон министерстве дӀахьожаду из каьхат, теша лов, цар цунна терко ергья, аьнна. Цигара болхлой цунца бувзаме бала ловш хуле, цун номер дӀалургья оаха.